Keshe Qasıetti Qurban aıt merekesi qarsańynda Qazaqstan Prezıdenti Nursultan Nazarbaev Astanadaǵy  "Áziret Sultan" meshitine bardy jáne Qazaqstan halqy men búkil álem musylmandaryn Qurban aıt merekesimen quttyqtady. Bul týraly «Qamshy» portaly Tengrinews.kz-ke silteme jasaı otyryp habarlaıdy.

«Bul kúni adamdar ókpe-renishterin keshirip, bir-birine jaqyn bola túsedi. Sondyqtan mereke biriktirýshi ról atqarady. Bizdiń halqymyz Táýelsizdik alǵannan keıin ıslam dinimen qaıta qaýyshty. Sonyń arqasynda damý baǵytyndaǵy jolymyzdy jalǵastyra otyryp, birligimiz ben tatýlyǵymyzdy nyǵaıttyq», - dedi Nursultan Nazarbaev moldanyń namazynan keıin.

Nursultan Nazarbaev sondaı-aq qazirgi zamandaǵy qaqtyǵystardyń negizgi sebepterine de toqtaldy. «Bular - eń birinshi jer aýmaǵyna baılanysty daýlar. Biz osyndaı daý týmaýy úshin kórshi eldermen ýaǵdalastyq arqyly shekaramyzdy bekittik. Ekinshi - etnosaralyq qaqtyǵystar. Óz ultyn ózgeden joǵary sanaý - asa úlken kúná. Biz Qazaqstanda kópultty halyqtyń birligin qamtamasyz ettik. Etnıkalyq tegine qaramastan, árkimdi de qurmetteı otyryp, eldegi turaqtylyqty nyǵaıttyq», - dedi Memleket basshysy.
Qaqtyǵystardyń úshinshi sebebi, onyń aıtýynsha - dinaralyq qaqtyǵystar, muny qazirgi ýaqytta búkil álemnen baıqaýǵa bolady.

«Elimizdiń musylmandary óz dinin ustana otyryp, ózgelerdi qurmetteıdi. Sonyń negizinde biz halyqtyń birligi men dostyǵyn qamtamasyz ettik. Sondyqtan halqymyzdy óz dininde meıirimdilik pen qaıyrymdylyq jolyn tańdaýǵa jáne óskeleń urpaqty osy baǵytta tárbıeleýge shaqyramyn», - dep qorytyndylady Prezıdent óz sózin.