Jambyldaǵy jarylystan aman qalǵan órt sóndirýshi Baıbek Sembekov áskerı qoımadaǵy jarylystyń qalaı bastalǵanyn baıandap berdi. Vıdeo studiya_7tv paraqshasynda jarıalandy.

Baıbek Sembekov Taraz qalalyq órt sóndirý bóliminiń qaraýyl basshysy. Jarylys bastalǵanda ol alǵashqylardyń biri bolyp áskerı qoımaǵa barǵan.

– Oqıǵa ornyna barǵanda, áskerılerdiń birine jolyǵyp, qoımada ne saqtalǵanyn suradym. Onyń qatardaǵy jaýynger nemese ofıser ekenin bilmedim. Jarylatyn zat bar ma degende, qatty jarylatyn zat joq dedi. Sodan biz birden sý alatyn jer izdeı bastadyq. Ol jerde sý múldem bolmady. Biz minip kelgen kólikterde 5 nemese 8 tonna ǵana sý bolǵan.

Bir áskerı adam kelip, tankterinde sý joq ekenin aıtty. Bizdegi sýdy soǵan quıý kerek boldy. Solaı jasadyq. Barlyq kólik órtke jaqyndady. Men kólikke otyrdym, qasymda bir sarbaz boldy. Endi órtti sóndiretin kezde, jarylys bastaldy. Sodan kóligimiz aýdarylyp ketti.

Qasymdaǵy eki sarbazben kóliktiń artqy jaǵyna otyrdyq. Ary qaraı naqty esimde joq. Bireý kóliktiń esigin nemese terezeni ashty. Bireýler aıqaılap, jylap jatty. Kóp adam jerde qan bolyp jatty. Men sóıleıin desem, aýzym áıekterge tolyp qalǵan. Toqtaýsyz qan túkire berdim. Qarasam kóliktiń aldyńǵy terezesi synyp, joq bolyp ketken.  

Syrtqa shyqqanda, bireýdiń kózi kórmedi, qulaǵy estimedi. Bul birinshi jarylys edi, 10 mınýttan keıin ekinshi jarylys boldy. Bárimiz jerde jattyq. Bireýdiń aıaǵy jaralandy. Barlyǵymyz qalaı aman qalsaq dep oılap jattyq. Sodan taǵy bir jarylys boldy da bir-birimizden kóz jazyp qaldyq.

Sosyn telefon arqyly olardyń qaıtys bolǵandaryn estidim, – deıdi Baıbek Sembekov. 

 

 

 

Posmotret etý pýblıkasıý v Instagram

 

 

 

Pýblıkasıa ot Vechernáá programma «Stýdıa 7» (@studiya_7tv)

26 tamyz kúni Jambyl oblysy Baızaq aýdanynda ornalasqan áskerı bólimde saǵat 19.00 shamasynda qoımalardyń biriniń janynda órt shyqqan. Órt saldarynan qoımadaǵy oq-dári jarylyp, saldarynan 15 adam qaza tapqan. Olardyń arasynda órt sóndirýshiler, tótenshe jaǵdaı mınıstrliginiń, áskerı bólimniń, áskerı kúzet pen áskerı prokýratýranyń qyzmetkerleri bar. Áskerı bólimnen jarty shaqyrym jerdegi Qaınar aýylyndaǵy úıler búlingen.

Jarylystan qaza tapqandardyń tolyq aty-jóni:

Efreıtor R.S.Janbolatov – 40 jasta

Serjant M.S.Mershimbaı – 40 jasta

Starshına E.E.Nádirbekov – 41 jasta

Azamattyq qyzmetker O.D.Dálibaev – 59 jasta

Ońtústik óńirdiń áskerı prokýrory A.Q.Qapezov – 44 jasta

Serjant-órt sóndirýshi A.S.Temirbolatov – 28 jasta

Polkovnık M.K.Aımanov – 45 jasta

Podpolkovnık A.N.Mıkropýlo – 50 jasta

Serjant, aǵa órt qutqarýshysy E.Q.Sandybaev – 30 jasta

Serjant, aǵa órt qutqarýshysy T.Q.Tórebekov – 40 jasta

Maıor S.J.Álimbekov – 36 jasta

Maıor, qaraýyl basshysy S.V.Zaıkın – 41 jasta

Aǵa serjant, júrgizýshi G.J.Qýatbek – 26 jasta

Kishi serjant, órt qutqarýshysy Á.Q.Ádilbek – 25 jasta

Qatardaǵy órt sóndirýshi Á.B.Keńes – 22 jasta