Denesiń 92 paıyzy kúıik shalǵan er azamat shymkenttik dárigerlerge alǵysyn jetkizdi. Órken Nahypbek jumys barysynda oryn alǵan jarylys saldarynan jaraqattanǵan.

Alǵashynda Qyzylorda oblysyndaǵy aýrýhanalardyń birinde jan saqtaý bólimine túsken naýqastyń jaǵdaıy aýyr bolypty. Anasynyń aıtýynsha, onda kombýstıolog dáriger bolmaǵan kórinedi. Naýqasqa megapolıstiń aq halattylary kómekke kelgen.

31 shilde kúni Qyzylorda oblysyndaǵy munaı óndirisinde jarylys oryn aldy. Dızel otynynyń janýy saldarynan úsh azamat túrli deńgeıde dene jaraqatyn alǵan. Onyń biri 24 jastaǵy Órken Nahypbek. Aıtýynsha, alǵashqy kómek kórsetilgen soń jergilikti aýrýhanaǵa jatqyzylypty. Denesiniń 92 paıyzy kúıik shalǵan er azamat 7 kúnnen soń Shymkentke jetkizilgen. Ómirge qaıta kelgendeı boldym degen ol dárigerlerge erekshe alǵysyn jetkizdi.

Qazir osy aýrýhanaǵa túskeli 20 kúnnen asyp qaldy. Osy aralyqta osy nátıje. Otyra almaı jatyr edim, tek jatatyn edim. Mine bir aptadan beri ózim otyramyn. Dárigerler áıteýir kúsh berip, tur dep turǵyzdy. Dárgerlerge aıtar alǵysym sheksiz. Osy kisilerdiń arqasynda osy jaǵdaıǵa jettim. Jaǵdaıym aýyr edi.

Órkenniń anasynyń sózinshe Qyzylordada kúıik shalǵan naýqasty emdeıtin dáriger bolmaǵan kórinedi. Al shymkenttik aq halattylar dereý kómek kórsetýge daıyn boldy deıdi ol. Munda 3 kún ishinde jan saqtaý bóliminen bólimshege aýystyrylyp, jaǵdaıy birqalypqa túsipti.

Dárigerlerdiń aıtýynsha, naýqastyń jaǵdaıy óte aýyr bolǵan. Joldy kótere almaıtyndyqtan eki ret arnaıy kombýstıolog dáriger baryp jaǵdaıdy baqylap otyrypty. Al, onda hırýrg pen travmatologtardyń qadaǵalaýynda bolǵan eken.

Óte aýyr jaǵdaıda túsken naýqasty biz jan saqtaý bólimine jatqyzdyq. Shoqqa qarsy terapıa, aýrýdy basý terapıasy, kúıiktiń óziniń emdeý boıynsha barlyq em tolyqqandy qamatamasyz etilip, taǵaıyndaldy. Naýqas áli de emin jalǵastyrady. Qudaı qalasa, biz bir apta kóleminde úıine shyǵaramyz dep josparlap otyrmyz.

Aıta keteıik, ortalyqta jyl basynan beri kúıik shalǵan 1200-den asa adam em qabyldaǵan. Onyń 60 paıyzy úı jaǵdaıynda jaraqattanǵan bolsa, 40 paıyzy óndiristik jumys orynda zardap shekken eken.