"Talıban" terorıstik uıymynyń resmı ókili úkimetke jańa mınıstrlerdi taǵaıyndady. Bul týraly The Khaama Press News Agency basylymy habarlady.

Qozǵalys ókiliniń aıtýynsha, mınıstrler kabınetin qurý boıynsha arnaıy konsýltasıalar aıaqtalǵan, nátıjesi jaqyn arada jarıalanady.

Basylym málimetinshe, Aýǵanstannyń syrtqy ister mınıstri bolyp "Talıban" saıası qanatynyń jetekshisi – Mýlla Abdýl Ǵanı Baradar taǵaıyndalǵan. Qorǵanys mınıstr qyzmetin qozǵalys jetekshisi Mýlla Omardyń uly mýlla Iakýb atqarady. İshki ister mınıstri bolyp radıkaldardyń aǵa basshylarynyń biri Djalalýddın Hakkanıdiń uly Halıfa Hakkanı taǵaıyndaldy.

Talıbandar Aýǵanstannyń burynǵy prezıdenti Hamıd Karzaı men beıbit kelissózderdiń burynǵy qatysýshysy Abdýlla Abdýllany Aýǵanstandy ótpeli kezeńde basqaratyn 12 adamnan turatyn keńes quramyna engizdi.

Agenttik jaqyn arada Aýǵanstan úkimetiniń tolyq quramy belgili bolatynyn aıtty.

– Úkimet aldaǵy birneshe kúnde qurylady. Biz bul prosesti 90-95 paıyzǵa aıaqtadyq jáne sońǵy kúnderi sońǵy nátıjeni jarıalaımyz, – dedi Talıban ókili Anas Hakkanı.

Buǵan deıin "Talıban" qozǵalysy Aýǵanstandy alǵannan beri birinshi ret óz kóshbasshysynyń sýretin kórsetken.

17 tamyzda Talıban sodyrlary Aýǵanstan astanasy Kabýlǵa kirip, prezıdent saraıyn basyp alǵan. Olar sol sátten bastap is júzinde Aýǵanstan Islam Ámirliginiń qurylǵanyn jarıalaǵan.