Halyqtyń osal toptaryn áleýmettik qorǵaý men qoldaý – áleýmettik saıasattyń basty baǵyttarynyń biri. Shymkent qalasynyń jumyspen qamtý jáne áleýmettik qorǵaý basqarmasynyń málimetinshe, qalada 36 823 múmkindigi shekteýli azamat tirkelgen, onyń ishinde 6 391-i – 18 jasqa deıingi múgedektigi bar balalar.

Atalǵan osal toptarǵa jáne ardagerlerge mereke men ataýly kúnderge arnalǵan bir rettik jáne aı saıynǵy 13 túrli kómek kórsetiledi. Jyl basynan beri múgedektigi bar azamattarǵa áleýmettik qyzmetter portaly arqyly qajetti quraldar men qyzmetterge tapsyrys berý tájirıbesi iske qosyldy. Iaǵnı, múgedektigi bar azamattar tehnıkalyq ońaltý quraldarynyń 55 túrin jáne qyzmetterdiń 3 túrin óziniń elektrondyq qoltańbasyn (ESQ) paıdalana otyryp, onlaın tapsyrys berýge qol jetkizildi.

Áleýmettik portal arqyly protezdik-ortopedıalyq, sýrdotehnıkalyq, tıflotehnıkalyq jáne gıgıenalyq quraldar, sondaı-aq, kreslo-arbalarmen qamtamasyz etý qarastyrylǵan. Arnaıy áleýmettik qyzmetterge jeke kómekshilerdiń, ymdaý tili mamandarynyń jáne sanatorıı-kýrorttyq emdeý qyzmetteri de kiredi.

Portal múmkindigi shekteýli azamattardyń úıinen shyqpaı-aq ESQ kómegine súıenýge múmkindik berýde. Nátıjesinde Shymkent qalasy boıynsha 26 714 ótinish qabyldanyp, 16 308 múkindigi shekteýli azamatqa ońaltý quraldary jetkizilgen.

Múgedektigi bar azamattardyń jeke ońaltý baǵdarlamasynda tehnıkalyq, protezdik-ortopedıalyq jáne gıgıenalyq quraldar qajettiligi kórsetilgen bolsa, «áleýmettik portal» arqyly tegin tapsyrys bere alady. Eger azamattar tehnıkalyq ońaltý quralynyń qymbat túrin tańdaǵan jaǵdaıda, ústindegi aqshasyn ózi tólep alýyna bolady.