Jambyl oblysyndaǵy áskerı qoımada bolǵan órtke qatysty qorǵanys mınıstrligi resmı túrde túsinikteme berdi.

″Injenerlik oq-dáriler qoımasynan órt shyqqan áskerı bólim ″Ońtústik″ óńirlik qolbasshylyǵynyń quramyna kiredi. 2016 jyldan bastap 2021 jyldyń mamyr aıyna deıin áskerı bólimniń komandıri Serik Baısaqalov bolǵan. Qorǵanys mınıstriniń buıryǵymen podpolkovnık Serik Baısaqalov 48 jasqa tolǵanda Qarýly Kúshterdiń qatarynan zapasqa shyǵaryldy. Al naqty Baısaqalov 2021 jyldyń 29 shildesinde bólimniń tiziminen alyndy.

Maýsym aıynda óńirlik qolbasshylyqtyń komısıasy bólimniń shtab bastyǵy maıor Aslan Baqytjanovqa komandırdiń isteri men laýazymyn ýaqytsha atqarýdy tapsyrdy. Bul jóninde bólim komandıriniń 2021 jylǵy 21 maýsymdaǵy №109 tıisti buıryǵy bar. Qazirgi kezde quzyretti organdar shtattyq bólim komandırin taǵaıyndaý maqsatynda jasalatyn tekserý prosedýrasy men kandıdatqa arnaıy ruqsat berý rásimin júrgizýde″ delingen habarlamada.

Órt bastalysymen áskerı bólimniń shtattyq órt sóndirý komandasy órt sóndirýshi eseptoptar kelgenshe tez arada ony oqshaýlaýǵa kirisken jáne Jambyl oblysynyń TJD-ǵa habarlaǵan.

"Budan ári İshki ister mınıstriniń 2017 jylǵy 26 maýsymdaǵy№ 446 buıryǵymen bekitilgen órt sóndirýdiń qoldanystaǵy qaǵıdalaryna sáıkes órt sóndirýge kelgen órtke qarsy qyzmet garnızonynyń aǵa laýazymyndaǵy adam oǵan tikeleı basshylyq etedi.

Órt sóndirý basshysy osy mindetterdi oryndaýǵa qatysatyn jeke quramdy, sondaı-aq órt sóndirýge jumyldyrylatyn kúshterdi basqarýǵa ókilettilik beriledi″,–deıdi baspasóz habarlamasynda.

Baızaq aýdanyndaǵy úılerdiń aýlalarynyń birinen tabylǵan oq-dárilerdiń qaldyqtaryna qatysty:

"Qorǵanys mınıstrligi paıdalanýǵa jaramsyz oq-dárilerdi Indýstrıa jáne ınfraqurylymdyq damý mınıstrliginiń vedimistik uıymy – ″Qaztehnologıa″ aksıonerlik qoǵamyna beredi. Sodan keıin ″Qaztehnologıa″ AQ oq-dárilerdi óndiristik kádege jaratý, olardyń quramyndaǵy jarylys qaýpi bar zattardy alý jáne olardy joıý prosesin júrgizedi.

Osydan keıin ǵana oq-dárilerdiń synyqtary elektrondyq gosreestr.kz. saýda alańy arqyly osyǵan ýákilettik berilgen ″Qaztehnologıa″ AQ arqyly satýǵa shyǵarylady.

Tabylǵan snarádtardyń qalyptary men oqsaýyttary – bul oq-dárilerdi kádege jaratqannan keıin alynǵan jáne elektrondyq saýda alańy arqyly jeke kásiporynǵa satylǵan metal synyqtary.

Olar qorshaǵan ortaǵa eshqandaı qaýip tóndirmeıdi. Bul metal synyqtaryn ″Baqtıar-Group″ jaýapkershiligi shekteýli seriktestigi 2021 jylǵy naýryzdyń sońynda Túrkistan oblysy Arys qalasyndaǵy ″Qazaqtehnologıa″ AQ metal synyqtarynyń qoımasymen jasalǵan shartqa sáıkes satyp alǵan.

Arys qalasynan Jambyl oblysyndaǵy qoımaǵa artılerıa oq-dárileri – snarádtar, zymyrandar tasymaldanǵan emes. Arys qalasynan Jambyl oblysyndaǵy qoımaǵa burynǵy órtten aman qalǵan ınjenerlik oq-dárilerdiń bir bóligi ǵana jetkizildi. Óıtkeni bul qoımada da osyndaı oq-dáriler túri saqtalady. Bul qoımada artılerıa oq-dárileri saqtalmaıdy" dep jazǵan vedmostova.

Eske sala keteıik, 26 tamyzda Jambyl oblysy Baızaq aýdanynda ornalasqan áskerı bólim qoımalarynyń biriniń mańynan órt shyǵyp, jarylys bolǵan.

Sońǵy málimetter boıynsha apat saldarynan kóz jumǵandar sany 15 adamǵa jetip otyr.