Nur-Sultanda keshki ýaqytta júgirýge shyqqan áıeldi zorlamaq bolǵan er adam ustaldy. Bul týraly qalalyq polısıa departamentiniń baspasóz qyzmeti habarlady.

Oqıǵa 3 qyrkúıek saǵat 19:34-ter shamasynda bolǵan. 102-arnasyna jas jigittiń áıeldi zorlaýǵa tyrysqany jáne onyń belgisiz baǵytqa qashyp ketkeni týraly habarlama kelip túsken.

Tekseris jumystaryn júrgizý barysynda 42 jastaǵy áıel B.Momyshuly kóshesiniń boıymen júgirýge shyqqany anyqtaldy. Keıin ol sońynan er adamnyń erip kele jatqanyn baıqaǵan. Jábirlenýshiniń aıtýynsha, kúdiktiniń qolynda eki paket bolǵan. Belgili bolǵandaı, kúdikti óz oıyn iske asyrmaq bolyp, kıimin aýystyryp, jasyrynýdy oılaǵan.

Polıseıler kúdiktiniń ishimdik ishken 20 jastaǵy jigit ekenin anyqtady. Ol mas kúıinde áıeldi qýyp jetip, ony jerge qulatyp, dóreki kúsh qoldanǵan. Kóshedegi kezdeısoq jolaýshylar áıeldiń aıqaıyn estip, kómekke kelgen. Oqıǵa ornynan qashyp ketken kúdiktini polısıa departamentiniń jeke quramy izin sýytpaı ustady.

Qazir atalǵan is boıynsha qylmystyq is qozǵalyp, tergeý amaldary júrgizilýde. Kúdikti ýaqytsha ustaý ızolátoryna qamaldy.