Soltústik Qazaqstan oblysynda Taý-ken baıytý kombınatynyń qyzmetkerleri 11 kúnnen beri ashtyq jarıalap jatyr. Kenshilerdiń sózinshe, Obýhov taý-ken baıytý kombınatyn bireýler reıderlik jolmen basyp almaqshy. Osylaısha narazylyqqa shyqqan jumysshylar tabyssyz qalamyz ba dep alańdaýly.

Óndiristi múldem toqtatyp tastaý úshin áldekimder kombınattaǵy elektr energıasyn sóndirip tastaǵan. Ashynǵan halyq kompanıa basshylaryna talaptaryn aıtyp, ashtyq jarıalaýdy jalǵastyrýda.

– Sybaılas jemqorlyqqa jol joq. Bizdiń máselemizge nazar aýdarmaıynsha ashtyqty jalǵastyra beremiz. Ashtyqqa daıynbyz, – deıdi jumysshylar.

Kombınatta qyzmet etip, adal asyn taýyp otyrǵan 500-ge jýyq qyzmetker Nur-Sultanda beıbit mıtıń ótkizbek bolǵan. Biraq, polısıa olardy aýyldan shyqqan boıda ustap áketken. Kompanıa basshylyǵy muny ákimdik pen reseılik quryltaıshylardyń ádeıi jasap jatqan isi dep topshalady.

– Bizben 10 jyldan astam ýaqyt seriktes bolǵan reseılik kompanıa ózimizdiń "Tioline" kompanıasyn álsiretip, tolyqtaı óz qaramaǵyna ótkizip alǵysy kelip otyr. Quryltaıshylardyń ondaǵy negizgi maqsaty – aktıvterdi reseılik iri "Bashqurt soda" kompanıasyna satý. Bul degenemiz – Qazaqstan óziniń myqty taý-ken ornyn sheteldikterge qoldan bere salady degen sóz, – deıdi kompanıanyń atqarýshy dırektory Vıktor Dolgalev.

Obýhov taý-ken baıytý kombınatynyń jumysshylary narazylyq bildirip, máselege memlekettik organdar nazar aýdarýyn suraıdy.