"Soltústik Koreıa belgisiz snarádty Japon teńizine qaraı atty" dep habarlady Ońtústik Koreıa shtab basshylary. Keıinirek onyń balıstıkalyq zymyran ekeni anyqtaldy. Odan keıin taǵy bir qanatty zymyrannyń atylǵany habarlandy. 

Japonıa da obektiniń atylǵanyn jáne bul balıstıkalyq zymyran bolýy múmkin ekenin habarlady.

Japonıa premer-mınıstri Ioshıhıde Sýga ushyrýdy aımaqtyń beıbitshiligi men qaýipsizdigine qater tóndiretinin aıtyp, bul áskerı áreketti "shekten shyqqan" dep atady.

BBC aqparatyna sáıkes, zymyrandardyń naqty qaıda baǵyttalǵany jáne ushý qashyqtyǵy belgisiz. Ońtústik Koreıanyń shtab basshylary Seýl armıasynyń "AQSH-pen tyǵyz yntymaqtastyqta tolyq daıyndyq kúıin" saqtap otyrǵanyn aıtty.

Balıstıkalyq zymyran synaqtary Pehenánnyń ıadrolyq belsendiligin shekteýge baǵyttalǵan BUU -nyń sheshimderine qaıshy keledi.

Ońtústik Koreıa men Japonıa qosymsha aqparat bermedi.

Aıta keteıik, Soltústik Koreıa Japonıanyń kóp jerine soqqy bere alatyn alǵashqy qanatty zymyranyn birneshe kún buryn synaqtan ótkizgen bolatyn.

Sarapshylardyń aıtýynsha, qanatty zymyran ıadrolyq oqtumsyqty alyp júre alýy yqtımal.