Shymkent qalasynyń ákimi Murat Áıtenovtiń tóraǵalyǵymen ınvestısıa jónindegi shtabtyń kezekti otyrysy ótti. Jıynda jańa ınvestısıalyq jobalar usynylyp, 8 aıdyń qorytyndysy boıynsha negizgi kapıtalǵa salynǵan ınvestısıa kólemi jáne hattamalyq tapsyrmalardyń oryndalý barysy talqylandy.

Jıynda «Zoom» júıesi arqyly jeke kásipkerler jańa jobalaryn usyndy. Avtomobıl, qurylys, medısına salasy boıynsha óndiristik kásiporyndar, saýda, áleýmettik nysandar jáne kópqabatty turǵyn úı baǵytynda, jalpy 13 joba tanystyryldy.

Atap aıtqanda, úndistandyq «Mannat Heltkear» JSHS avtomobıl qosalqy bólshekteri óndirisi, bıoaktıvti qospalar óndirisin, ırandyq «KHZ EXPO-777» JSHS bazalt talshyqtan otqa tózimdi mata óndirý, túrkıalyq «OZDIL» JSHS kompanıasy ókilderi gazoblok óndirisi jobasyn júzege asyrýǵa nıetti ekenin jetkizdi.

Odan bólek, «Lotos Trade» JSHS boıaý materıaldary, «UnitPacking» JSHS qaǵaz jáne gofrokarton óndirisi, «Beknaz ı K» JSHS Qursaı shaǵynaýdanynda 500 oryndyq mektep, «Aı-Arý» JSHS UEFA talaptaryna saı eki fýtbol alańyn salý, «Arnat Invest» JSHS «Shymkent sıtı» shaǵynaýdanynda zamanaýı saýda-oıyn-saýyq ortalyǵy, «Meıram» JSHS kınostýdıa jobasyn usyndy.

Sonymen qatar, «Integra Construction KZ» JSHS, «01KZ-Building» JSHS, «NTR» JSHS kópqabatty turǵyn úı qurylysyn salýǵa qyzyǵýshylyq tanytyp otyr.

Ár jobaǵa jeke toqtalyp ótken qala basshysy, týyndaǵan jáne týyndaýy múmkin degen máselelerdiń ýaqytyly sheshimi úshin tıisti sala basshylaryna naqty tapsyrmalar berdi. Ár jobaǵa barynsha kómek kórsetiletinin, jer telimi jáne ınfraqurylym sekildi máseleler sheshimin tabatynyn aıta kele, kásipkerlerge alǵysyn bildirdi.