Qazaqstanda qyrkúıektiń ekinshi jeksenbisi – Otbasy kúni. Osyǵan oraı búgin Shymkent qalasynyń jumyspen qamtý jáne áleýmettik qorǵaý basqarmasynyń «Azamattyq hal aktilerin tirkeý bóliminde» bir aı buryn nekege turýǵa ótinish bildirgen 37 jupty tirkedi. Bul týraly AHAT bóliminiń basshysy Akbota Qarnakbaeva málimdedi.

AHAT bólimi mereke qarsańynda shańyraq kótergen alty jupqa neke qıý kýáligin saltanatty jaǵdaıda tapsyrdy. Nekelerin qıyp kýálik alǵan bul otbasylarǵa gúl shoǵy men syılyqtar tabystaldy.

Nekesin qıǵan juptyń biri – qala turǵyny Aıan men Aqmaral. Buǵan deıin olar 1 jyldaı aralasyp, bir-birimen kóńil jarastyrǵan. Qazirde jas otbasy ata-anasymen birge turady. Bolashaqta baspana kezegine qujat tapsyrýdy josparlap otyr.

Sonymen birge jas jubaılarǵa otbasy qundylyqtary túsindirilip, irgesi berik, jarasymdy januıa qalyptastyrý jaıy nasıhattaldy.

Akbota Qarnakbaevanyń aıtýynsha, ótken jyldyń segiz aıymen salystyrǵanda otbasy qurǵandar sany eki myńǵa artyp, jyl basynan beri 5 myńnan asa neke qıylǵan.

Shymkent qalalyq jumyspen qamtý jáne áleýmettik qorǵaý basqarmasynyń «Azamattyq hal aktilerin tirkeý» bólimi 8 túrli memlekettik qyzmet túrlerin kórsetedi. Qyzmetterdi úıden shyqpaı-aq, onlaın túrde alýǵa jaǵdaı jasalǵan. Sıfrlyq júıe arqyly nekege turýǵa ótinish bergen jup AHAT bólimine bir aıdan keıin qujattaryn alýǵa ǵana keledi.