Talıban bılik basyna kelgen soń Aýǵanstannyń óner adamdary da shetelge qashyp jatyr.

Talıbandar mýzykaǵa tyıym salǵan. Tálipter tamyz aıynda Baglan provınsıasynyń soltústiginde "halyq ánshisin óltirdi" dep aıyptalýda.

Qarýly top bul aıyptaýǵa jaýap bergen joq.

Al, aýǵan ánshisi Favad Andarabıdiń uly Djavad Assoshıeıted Pres agenttigine bergen suhbatynda ákesiniń Andarab alqabyndaǵy fermada basynan oq tıip qaza tapqanyn aıtty.

BBC Aýǵanstannan qashyp, Pákistan shekarasyn zańsyz kesip ótken jáne qazir jasyrynyp júrgen alty ánshimen sóılesken. Ánshilerdiń biri "Aýǵanstanda qalsam ólim jazasyna kesilemin" dep qorqatynyn aıtady.

Ózin Han dep tanystyrǵan aýǵan ánshisi sońǵy 20 jyl boıy Kabýlda turyp, búkil eldegi úılený toılarynda án aıtyp, mýzyka oınaǵan. Halyq ánshileri pýshtýndardyń úılený toılarynda tanymal. 

"Talıbannyń burynǵy rejımi kezinde mýzykaǵa tyıym salynǵan bolatyn, biraq bıznes 2001 jyly tálipter bıligi qulatylǵannan beri jaqsy boldy" deıdi ol.

Biraq ótken aıda tálipter Kabýldy baqylaýǵa alǵannan keıin, Talıban jaýyngerleri Handy izdep kelip, onyń mýzykalyq aspaptaryn syndyrǵan.

– Tún ortasynda qyzmettik kúzetshim maǵan qońyraý shalyp, bireýlerdiń myltyqpen kelip, barlyq mýzykalyq aspaptardy syndyrǵanyn aıtty. "Kúzetshim olar áli de osynda, sen týraly surap jatyr" dep habarlasty, – deıdi Han.

Ánshi otbasymen birge kelesi kúni tańerteń Kabýldan ketken.

Torham men Chaman shekara beketteri arqyly Aýǵanstannan qashqan ánshiler men mýzykanttar qazir Islamabad pen Peshavar mańynda jasyrynyp, Pákistannan basqa elde pana izdeýdiń jolyn qarastyrýda.

Ánshilerdiń sózinshe, tálipter jergilikti FM radıostansıalarynda mýzykaǵa tyıym salǵan.

Dostary men týystaryn qosqanda bes otbasymen elden qashqan taǵy bir ánshi Ahtar (aty ózgertilip alynǵan) Peshavardaǵy dosyna jetý úshin bes kún boıy qashqanyn aıtady.

Qaýipti sapar kezinde ol júrek aýrýymen aýyratyn jeti jasar qyzy úshin qatty alańdaǵanyn jetkizdi. "Men óz ómirim úshin emes, qyzymnyń ómiri úshin qatty ýaıymdadym" deıdi ol.