Almaty qalalyq polısıa departamenti basshysynyń tergeý isi jónindegi orynbasary Rýstam Ábdirahmanov Aqbulaqtaǵy oqıǵanyń qalaı bolǵanyn baıandap berdi.
– Tragedıa shamamen saǵat 17:00-de bolǵan. Sot oryndaýshysy men polıseıler sot úkimin oryndaýǵa kelgen. Sol kezde baspanany bosatýǵa mindetti er adam úıge kirip ketti de, zańdy túrde tirkelgen qarýdan sot oryndaýshysy men aýlada turǵan adamdarǵa oq atty. Qaıtys bolǵandardyń ishinde bizdiń eki qyzmetkerimiz, sot oryndaýshy jáne taǵy eki adam bar. Qaıtys bolǵandardyń arasynda úıdiń jańa ıesi de bar, – dedi Rústem Ábdirahmanov.
Ábdirahmanov qarýly qaqtyǵysqa qatysty kúdikti qylmysy úshin 20 jylǵa deıin nemese ómir boıyna bas bostandyǵynan aıyrý jazasy berilýi múmkin ekenin aıtty.
Sondaı-aq qalalyq polısıa departamentiniń bastyǵy Qanat Taımerdenov atys kezinde qaıtys bolǵan besinshi adam týraly aqparat berdi.
– 5-shi adam úıdi satyp alǵan kisiniń tanysy. Ol kýáger retinde birge kelgen, – dedi Taımerdenov.
Taımerdenov Aqbulaqta atys kezinde qaıtys bolǵan eki polıseı týraly aıtty.
– Darhan Súleev bizde 2004 jyldan beri jumys istegen. Jaqynda ǵana akademıany aıaqtady. Onyń bes balasy qaldy. Al Nurbol Baıǵazıev 2014 jyly keldi. Onyń eki balasy qaldy. Balalardyń bári kámelettik jasqa tolmaǵan. Ýchaskelik ınspektorlar Aqbulaq aýdanynda jumys istegen. Ekeýi de jaqsy qyzmet atqardy. Halyq tarapynan talaı ret alǵys aıtyldy, – dedi ol.
Qazir Qylmystyq kodekstiń 99-baby 2-bóligi (eki jáne odan kóp adamdy óltirý), sondaı-aq, 380-bap (bılik ókiline shabýyl jasaý) boıynsha sotqa deıingi tergeý bastaldy.
Almaty qalasynyń ákimi Baqytjan Saǵyntaev pen İshki ister mınıstri Erlan Turǵymbaev Almaty qalasyndaǵy atysta qaıtys bolǵandardyń jaqyndaryna kóńil aıtty.
Aıta keteıik, 20 qyrkúıekte keshki saǵat 17:00-de Almatydaǵy "Aqbulaq" shaǵyn aýdanynda tótenshe oqıǵa boldy. Birneshe polısıa qyzmetkeri, jeke sot oryndaýshylary jáne úıdiń jańa ıesi boryshkerdi shyǵarý týraly sot sheshimin oryndaýǵa kelgen.
Oq atqan adamnyń otbasyna tıesili úı buryn bankke qaryz bolǵany úshin satylǵan. Jeke úı sot oryndaýshysy arqyly úshinshi tulǵaǵa satylǵan. Úıdiń burynǵy ıesi sot sheshimimen kelispeı, úıin bergisi kelmegen. Sot jańa úı ıesiniń jaǵyna shyǵyp, úıge kirmek bolǵan kezde burynǵy ıesi oq jaýdyryp 5 adamdy atyp tastaǵan.
Pikir qaldyrý