Qytaıdyń ekinshi iri jyljymaıtyn múlik kompanıasy ǵalamdyq qor naryǵy men krıpto naryǵyn quldyratty. 

Qarjylyq sarapshylardyń pikirinshe, qor naryǵy men jahandyq krıpto naryǵynyń quldyraýyna Qytaıdyń iri jyljymaıtyn múlik kompanıasy  "Evergrande Real Estate Group" aksıalarynyń 10,24 paıyzǵa tómendeýi sebep bolǵan. Aldymen Gonkong qor naryǵy quldyrady. Gonkongtaǵy "Hang Seng" ındeksi  52 aptadaǵy eń tómengi deńgeıge tústi. 

Buǵan deıin kompanıa ındeksi 17 paıyzǵa tómendegen bolatyn. "Evergrande" jyljymaıtyn múlik toby "Fortune Global 500" tizimine sáıkes, satylym kólemi boıynsha Qytaıdaǵy ekinshi iri qurylys kompanıasy. Ol sonymen qatar álemdegi eń tabysty 122 iri kompanıaǵa kiredi.

Gonkongtaǵy taǵy bir iri jyljymaıtyn múlik toby "Henderson Land Development Co."-nyń da aksıalary aıtarlyqtaı satylǵan.

Mamandar "Evergrande Real Estate Group"-tyń shamamen 2 trıllıon dollar qaryzǵa batqanyn aıtady. Álemdegi jetekshi jyljymaıtyn múlik korporasıalarynyń qaryz daǵdarysyna qatysty alańdaýshylyq naryqqa keń aýqymdy yqpal etti. Bank aksıalary, joǵary kiristi dollarlyq oblıgasıalar jáne saqtandyrý fırmalary daǵdarys yqpalyna ushyraýda.

Qyrkúıektiń altynshy kúni 52 myń dollardan asqan Bıtkoın baǵasy búgin tańerteń 40 myń dollarǵa deıin qulady.

Bir saǵattyń ishinde Bıtkoın naryǵy 312 mıllıon dollar joǵaltty. Krıptovalútada BTC aıyrbasynyń birneshe ese ósýi baıqaldy. Bıtkoınnyń jappaı satylýy jalǵasa berse, krıpto naryǵynyń áli de quldyraýyna alyp kelýi yqtımal.

Aıta keteıik, Qytaı bıligi sıfrlyq valútaǵa qatal saıasat ustana bastaǵannan keıin jáne Tesla kompanıasy Bıtkoındi tólem túri retinde qabyldamaıtynyn jarıalaǵan soń, bıyl sáýirde eń joǵary shekke (shamamen 63 myń dollarǵa) jetken krıpto naryǵynda quldyraý bastalǵan.   Quldyraý shildege deıin jalǵasty. Shildeniń 21 kúni Twitter kompanıasynyń bas atqarýshy dırektory Djek Dorsı, Tesla jáne SpaceX kompanıasynyń dırektory Ilon Mask onlaın kezdesý ótkizip, ınvestorlar men kompanıalarǵa krıptovalútanyń múmkindikteri týraly pikirlerin jarıalaǵan soń, sol kúnnen bastap krıpto naryǵy ońala bastaǵan.