İshki ister mınıstri Erlan Turǵymbaevtyń tapsyrmasy boıynsha, mınıstrdiń orynbasary Murat Baımuqashev qaza tapqan polısıa qyzmetkerleri Darhan Súleev pen Nurbol Baıǵazıevtiń otbasylaryna bardy. Bul týraly Almaty qalalyq polısıa departamenti bastyǵynyń tergeý boıynsha orynbasary Rústam Abdrahmanov instagram paraqshasynda jarıalady. 

Murat Baımuqashev ishki ister mınıstriniń atynan, qyzmettik mindetterin atqarý kezinde qaza tapqan polıseılerdiń týystary men jaqyndaryna kóńil aıtty. 

"İshki ister mınıstriniń ótinishi boıynsha Almaty qalasynyń ákimdigi qaza tapqan polısıa qyzmetkerleriniń otbasylaryna turǵyn úı beredi. Sonymen qatar, zań kúzetinde turǵan ýchaskelik ınspektorlar qaıtys bolǵannan keıin "quqyq tártibin qamtamasyz etýge qosqan úlesi úshin" medaldarymen marapattaldy" delingen habarlamada.