Almatydaǵy Aqbulaq móltekaýdanynda bes adamǵa oq atqan Igor Dýjnov 10 shaqty kompanıa men jeke tulǵalarǵa qaryz ekeni anyqtaldy. Bul týraly KTK telearnasy habarlady.

Dýjnov burynǵy otbasylyq dosynan 35 myń eýro qaryz alyp, 10 jyldan beri qaıtarmaı júrgeni belgili boldy.

– Men Igordyń otbasyn 16 jyldan beri tanımyn. 2009 jyly ákem qaıtys bolǵan soń, 4 kúnnen keıin Igor anama kelip, qolhatpen qaryz alyp ketken. Muny anam maǵan 5 jyldan keıin ǵana aıtty. Sosyn men ony sotqa berip, jeńip shyqtym. Biraq aqshany qaıtarý múmkin bolmady. Sol kezde biz Igordiń qaryzǵa batyp, dúnıe-múlkiniń barlyǵy kepilde turǵanyn bilgenbiz, – dedi jýrnalıs Elena Vınokýrova. 

Elenanyń sózinshe, Dýjnov (bes adamǵa oq atqan - red)  Donbasstaǵy soǵysqa baryp, eki jyldaı habar-osharsyz ketken.

– Men Igordan eki jyl boıy qaıda bolǵanyn suradym. Ol maǵan "Donbassta soǵystym" degen. Al jubaıy kúıeýin qaryz bergen adamdar urlap áketti dep aryz jazǵan. Nege adamdar qaryzdy ońaı bere saldy depte oıladym. Sebebi bul otbasy músheleri dindar adamdar edi. Shirkeý salýǵa kómektesip, qaıyrymdylyqpen aınalysqan. Aýqatty otbasy bolǵan, – dedi Elena Vınokýrova. 

2000 jyldary Dýjnovtyń áıeli Anaıda Demırchán, Reseıden dóńgelek ákelip, kóterme saýdamen aınalysqan. Keıin bul bıznesti kúıeýine tapsyryp, sulýlyq salonyn ashqan.

Elenanyń aıtýynsha, Dýjnov qaryz alyp qaıtarmaı úırengen adam. Osy qaryz alǵan adamdar oǵan tynyshtyq bermeı,  osyndaı qylmysqa barǵan. 

Boryshkerlerdiń tizimi jarıalanatyn arnaıy saıtta Dýjnovtyń 10 shaqty kompanıa men jeke tulǵalarǵa qaryzy bar ekeni kórsetilgen. Sol úshin oǵan Qazaqstan aýmaǵynan shyǵýǵa tyıym salynǵan.

Eske sala keteıik, Almatydaǵy Aqbulaq yqshamaýdanynda 20 qyrkúıek kúni keshki saǵat 17:00 shamasynda atys bolǵan.

Oqı otyryńyz: “Eki polıseıdiń máıitin kórdim”. Kýágerler Almatydaǵy atystyń qalaı bolǵanyn aıtyp berdi

Aqbulaqtaǵy tragedıa: Qaıtys bolǵandar týraly aqparat belgili boldy

Almatydaǵy atys: 5 adamdy óltirgen kúdikti kim ekeni anyqtaldy