Qazgıdromet 28-30 qyrkúıekke arnalǵan aýa raıy boljamyn jarıalady.

Sınoptıkter boljamyna sáıkes, Qazaqstan aýmaǵynyń basym bóligi sıklon yqpalynda bolady.

Soǵan baılanysty soltústikte, soltústik-batysta, ortalyq pen shyǵysta jaýyn-shashyn (jańbyr, qar) jaýýy múmkin, ońtústikte, ońtústik-shyǵysta naızaǵaı oınap, jańbyr jaýady.

Qazaqstannyń batysynda, soltústiginde, ortalyǵynda jáne shyǵysynda tuman túsip, jel kúsheıedi, soltústik jartysynda kóktaıǵaq kútiledi.

Batysta aýa temperatýrasy túnde -3 gradýsqa deıin tómendeýi múmkin. Kúndiz 7-22 gradýs aralyǵynda bolady.

Soltústik-batysta túnde aýa temperatýrasy -5 gradýsqa deıin tómendep, kúndiz +13-ke deıin joǵarylaıdy.

Soltústikte aýa temperatýrasy túnde -6 gradýs, kúndiz +8 gradýsqa deıin tómendeıdi dep kútilýde.

Ortalyqta túnde -8, kúndiz +10 gradýs, Shyǵysta túnde -10, kúndiz +10, ońtústik jáne ońtústik-shyǵysta túnde 7 gradýs, kúndiz 12 gradýs jyly bolady.