Kabýlda Qazaqstannan Aýǵanstanǵa qajetti gýmanıtarlyq kómek máselesi talqylandy. Bul týraly syrtqy ister mınıstrliginiń baspasóz qyzmeti habarlady.

Qazaqstannyń Kabýldaǵy elshisi Álimhan Esengeldıev Aýǵanstan ýaqytsha úkimetindegi syrtqy ister mınıstriniń mindetin atqarýshy Ámir Han Mýttakımen kezdesdi. Kezdesý kezinde aýǵan halqyna azyq-túlik pen basqa da gýmanıtarlyq kómek kórsetý máseleleri talqylanǵan.

Aýǵanstannyń syrtqy saıası vedomstvasynyń basshysy Qazaqstan tarapyna ótpeli qıyn kezeńde aýǵan halqyna eleýli qoldaý kórsetýge ázirlik bildirgeni úshin alǵysyn aıtqan.

Onyń sózinshe, Aýǵanstannyń jańa bıligi barlyq eldermen, birinshi kezekte kórshilermen jáne óńirdegi memlekettermen beıbit qarym-qatynas ornatýǵa, sondaı-aq el aýmaǵynan olardyń qaýipsizdigine qandaı da bir qaterdiń týyndaýyna jol bermeýge daıyn.

Ámir Han Mýttakı Aýǵanstannyń jańa bıligi Qazaqstannyń syrtqy saıasatyna, sonyń ishindegi aýǵan baǵytyndaǵy ustanymyna qurmetpen qaraıtynyn atap ótti.