Densaýlyq saqtaý mınıstri Alekseı Soı úkimettiń keńeıtilgen otyrysynda elde koronavırýs ınfeksıasyn juqtyrýshylar 36 paıyzǵa tómendegenin málimdedi. 

– Qazaqstanda koronavırýspen aýyrý kórsetkishi sońǵy 2 aptada 36 paıyzǵa tómendedi. 1 tamyzdan bastap elimizde ınfeksıalyq tósek-oryndar júktemesi 56-dan 33 paıyzǵa, reanımasıalyq tósek-oryn júktemesi 45-ten 32 paıyzǵa tómendedi. Elde 57 kovıdtik stasıonar jabyldy, –  dedi ol. 

Mınıstrdiń sózinshe, 23 tamyzdan beri táýligine koronavırýstan saýyǵyp shyqqandar sany artyp keledi.

Sonymen qatar koronavırýs juqtyrý kórsetishi DDSU eýropalyq óńirlik búrosyna kiretin 32 elde tómendegen. Atap aıtqanda Ispanıada – 57, Shveısarıa, Fransıa jáne Ázerbaıjanda – 40, Qyrǵyzstanda – 36, Grýzıada – 32, Italıada – 28, Izraılde – 21, Germanıada 18 paıyzǵa azaıǵan.

Qazir Qazaqstannyń 4 óńiri – Jambyl, Qyzylorda, Mańǵystaý jáne Túrkistan oblystary "jasyl" aımaqta tur.

Al segiz óńir – Shymkent, Almaty, Atyraý, Aqtóbe, Qostanaı, Shyǵys Qazaqstan, Batys Qazaqstan jáne Soltústik Qazaqstan oblystary "sary" aımaqta ornalasqan. 

Qalǵan 5 óńir "qyzyl" aımaqta.