Abaı aýdanyna qarasty Aqtas-2 shaǵynaýdany aýyz sýyn tasymaldy tutynatyn shaǵynaýdandar qatarynda. Bul máseleni sheshý úshin ótken jyly merdiger mekeme «Altyn konstrakshn» tarapynan qurylys jumysy bastalǵan.

Búginde uzyndyǵy 50,9 shaqyrymdy quraıtyn aýyz sý qubyrynń 87 paıyzy ornatyldy. Qurylys jumysy tolyǵymen qarasha aıynda aıaqtalyp, paıdalanýǵa beriletin bolady. Nátıjesinde jyl sońyna deıin Aqtas-2 shaǵyn aýdanyndaǵy 1222 turǵyn sapaly aýyz sýmen qamtylady.

Aıta ótsek, qala turǵyndarynyń 95,6 paıyzy sapaly aýyz sýmen qamtamasyz etilgen. Bul kórsetkishti arttyrý maqsatynda bul jyly 14 nysannyń qurylysy júrgizilip jatyr. Jyl sońyna deıin aýyz sýy tasymaldy 7 eldi meken (Turan, Soltústik saıajaı, Yntymaq-2, Batys, Jańaturlan, Asar-2, Aqtas) jáne kestemen beriletin 2 eldimekende (Jańatalap, Saýle) aýyz sý máselesi sheshiletin bolady. Nátıjesinde búgingi kúnge deıin aýyz sýy tasymaldy bolyp kelgen eldimekenderdiń máselesi tolyǵymen sheshilip, qala turǵyndaryn sapaly aýyz sýmen qamtylý kórsetkishi 98 paıyzǵa ósedi.