Qala halqyn azyq-túlikpen tolyqqandy qamtamasyz etý ári sapaly ónimdi óndirý mańyzdy maqsattyń biri. Barlyq resýrstardy nazarǵa alsaq, Qazaqstan agroónerkásiptik keshendegi áleýeti joǵary memleket retinde esepteledi.

Osy rette, Shymkent qalasynyń aýyl sharýashylyǵy jáne veterınarıa basqarmasy qala halqyn azyq-túlikpen qamtý týraly málimdedi.

Olardyń aıtýynsha, azyq-túlik taýarlarynyń tutyný normasyna sáıkes, Shymkent qalasynyń halqy bir jylda birinshi surypty unnan – 14 256 tonna, qalypty bólke nannan – 77 529 tonna, rojkıden – 4 825 tonna, qaraqumyq jarmasynan – 2 193 tonna, kúrish – 9 321 tonna, kartop – 104 177 tonna, sábiz, pıaz – 21 932 tonna, qyryqqabattan – 14 913 tonna, shekerden – 19 739 tonna, kúnbaǵys maıynan – 7 676 tonna, sıyr etinen – 16 449 tonna, taýyq etinen – 5 483 tonna, aıran, sútten – 92 663 tonna, jumyrtqadan – 155 717 200 dana, tuzdan – 2 401 tonna jáne súzbeden – 5 373 tonna tutynady eken.

Búginde áleýmettik mańyzy bar azyq-túlik ónimderiniń tizimine (un, nan, makaron, qaraqumyq, kúrish, kartop, sábiz, pıaz, qyryqqabat, qant, kúnbaǵys maıy men sary maı, sıyr jáne taýyq eti, sút, aıran, jumyrtqa, tuz, súzbe) 19 azyq-túlik ónimi kiredi.

Jalpy megopolıs ózin-ózi birinshi surypty un, rojkı, kúnbaǵys maıy jáne taýyq jumyrtqasymen 100 paıyzǵa qamtamasyz ete alady. Al sút ónimderimen – 50 paıyzǵa, taýyq etimen – 41 paıyzǵa, sıyr etimen – 65 paıyzǵa jáne kókónis ónimderimen – 10-15 paıyzǵa qamtamasyz etýge qaýqarly.

Mamandar tuz, qaraqumyq jarmasy, kúrish jáne sheker sekildi azyq-túlik taýarlarynyń qalamyzda óndirilmeýine baılanysty olar kórshiles oblystardan jáne shet memleketterden tasymaldanatynyn aıtty.

Sonymen birge olar qalada áleýmettik mańyzy bar azyq-túlik taýarlarynyń qory, taýar óndirýshilerdi, qoımalar men saýda nysandaryn qosqanda jetkilikti jáne de tapshylyq boıynsha eshqandaı qaýip joq ekenin málimdedi.