Soltústik Koreıa memlekettik aqparat quraldary eldiń lıderi Kım Chen Ynnyń qaryndasy Kım Ó Chjon eldiń sheshim qabyldaýshysynyń biri bolyp taǵaıyndalǵanyn habarlady.

Soltústik Koreıanyń memlekettik "KCNA" aqparat agenttiginde jarıalanǵan habarlama boıynsha Kım Ó Chjon qazir eldiń basqarýshy organy Memlekettik ister jónindegi komısıanyń múshesi bolyp sanalady.

Kım Ó Chjon eldiń eń mańyzdy saıası qaıratkerleriniń biri jáne aǵasynyń negizgi keńesshisi. 

Kım Ó Chjonnyń sheshimder qabyldaýshy negizgi komıtetke kóterilýi onyń Soltústik Koreıa basshylyǵyndaǵy rólin resmı túrde dáleldegen sıaqty.

Ol aǵasynyń eń senimdi jáne adal adamdarynyń biri bolyp sanalady. Ótken jyly Ońtústik Koreıanyń Ulttyq barlaý qyzmeti ony "is júzinde ekinshi orynda" dep baǵalady, biraq onyń resmı mártebesi árqashan túsiniksiz bolyp kelgen bolatyn.