Májilistiń Áleýmettik-mádenı damý komıteti Qazaqstan Respýblıkasynyń Úkimeti bastamashylyq etken "Qazaqstan Respýblıkasynyń keıbir zańnamalyq aktilerine kórneki aqparat máseleleri boıynsha ózgerister men tolyqtyrýlar engizý týraly" Qazaqstan Respýblıkasy zańy jobasyn qarap, tómendegini atap ótedi.

Zań jobasy 2021 jylǵy 24 aqpanda májilistiń jalpy otyrysynda birinshi oqylymda maquldanǵan.

Zań jobasy orfografıa normalaryn jáne mátinderdiń teńtúpnusqaly aýdarmasyn saqtaý jónindegi talaptardy belgileý arqyly derektemeler men kórneki aqparatty ornalastyrý máseleleri boıynsha Qazaqstan Respýblıkasynyń zańnamasyn odan ári jetildirýdi maqsat etedi.

Zań jobasymen jumys isteý barysynda depýtattar:

- ákimshilik-aýmaqtyq birlikterdiń, eldi mekenderdiń quramdas bólikteriniń, sondaı-aq basqa da fızıkalyq-geografıalyq obektilerdiń dástúrli tarıhı qalyptasqan qazaq ataýlaryn memlekettik tilde jazýǵa;

- memlekettik emes uıymdardyń blankileri men mańdaıshalaryn memlekettik tilde, qajet bolǵan kezde orys jáne (nemese) basqa da tilderde jazýǵa baǵyttalǵan túzetýler engizdi. Bul rette, eger memlekettik emes uıymdardyń mańdaıshalarynda Qazaqstan Respýblıkasynda qorǵalatyn taýar belgileri paıdalanylǵan jaǵdaıda, olar ózgermeıtin túrde jazylady;

- eger Qazaqstan Respýblıkasy ratıfıkasıalaǵan halyqaralyq sharttarda ózgeshe kózdelmese, jol belgilerindegi jazbany memlekettik tilde jazýǵa;

- eger Qazaqstan Respýblıkasynyń zańnamalyq aktilerinde ózgeshe kózdelmese, habarlandyrýlardy, jarnamany, preıskýranttardy, baǵa kórsetkishterin, as mázirin, nusqaǵyshtar men basqa da kórneki aqparatty memlekettik tilde, qajet bolǵan kezde orys jáne (nemese) basqa da tilderde ornalastyrýǵa;

- kórneki aqparat mátinderin ornalastyrý máseleleri jónindegi zańnamalyq aktilerdiń normalaryn «Qazaqstan Respýblıkasyndaǵy til týraly» Qazaqstan Respýblıkasy Zańynyń talaptaryna sáıkes keltirýge baǵyttalǵan túzetýler engizdi.

Budan basqa, din salasyndaǵy zańnamany jetildirýdi kózdeıtin normalar engizildi. Aıtalyq, ǵıbadat úılerinen tys jerlerde dinı is-sharalardy ótkizý týraly habarlaý rásimi habarlama tártibine aýystyrylady, óńirlik dinı birlestikterdi tirkeý kezindegi talaptar ózgertildi, dinge senýshilerdiń jáne dinge senbeıtinderdiń azamattyq quqyqtary naqtylandy, dintaný saraptamasyn júrgizýge tartylatyn adamdar toby keńeıtildi.

Dinı qyzmetti reglamentteıtin usynystardyń engizilýine baılanysty zań jobasynyń taqyrybyn «Qazaqstan Respýblıkasynyń keıbir zańnamalyq aktilerine kórneki aqparat jáne dinı qyzmet máseleleri boıynsha ózgerister men tolyqtyrýlar engizý týraly» dep ózgertý boıynsha túzetý engizildi.

Budan basqa, jekelegen normalar naqtylanyp, zań jobasynyń mazmunyn jaqsartatyn redaksıalyq túzetýler engizildi.

Depýtattardyń usynystaryn qaraý qorytyndysy boıynsha zań jobasynda Qazaqstan Respýblıkasynyń 1 kodeksine jáne 16 zańyna túzetýler engizý kózdelgen.

Parlament Májilisiniń barlyq komıteti zań jobasyna oń qorytyndy berdi.

Jumys tobynyń 13 otyrysy jáne Komıtettiń keńeıtilgen eki otyrysy ótkizildi. 70-ke jýyq túzetýler kelip tústi, olardy jumys toby qarap shyqty. Salystyrmaly keste qabyldanǵan 54 pozısıadan turady.

Osy aıtylǵandardy eskere otyryp, Komıtet «Qazaqstan Respýblıkasynyń keıbir zańnamalyq aktilerine kórneki aqparat jáne dinı qyzmet máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasyn ekinshi oqylymda maquldap, ony Qazaqstan Respýblıkasy parlamenti senatynyń qaraýyna jiberýge bolady dep esepteıdi

Májilistiń baspasóz qyzmeti