Aqyn, belsendi, dıssıdent Aron Atabek bostandyqqa shyqqannan keıin alǵash ret Azattyq radıosyna suhbat berdi.
– Aýrýhanada 10 kún boıy ornymnan turmadym. Palatada meni kótermedi. Jattym, aıaǵymda atrofıa boldy. Osyǵan baılanysty álsizdik basty. Qoldarym kótertpeıdi, saýsaqtarym búgilmeıdi. Buryn túrmede óz aıaǵymmen júrdim, – dedi dıssıdent.
Belsendi bılikten ózin kinásiz dep tanyp tolyq aqtaýdy jáne ótemaqy berýdi talap etedi.
– Muny (bul talapty - red) úkimge deıin de keıin de aıtqanmyn. Japon samýraılarynyń "samýraı sońyna deıin adal shaıqasýy tıis" deıtin ustanymy bar. Men – qazaqtyń samýraıymyn, meniń de mindetim – sońyna deıin kúresý, – dep aıtty Aron Atabek.
Suhbat barysynda belsendi Muratbek Esenǵazy Aron Atabek ókpesiniń 38 paıyzy qabynǵanyn aıtty.
– Ókpesi qabynǵan, jaǵdaıy nashar. Dárigerler: "aýrýhanaǵa jatqyzbasa bolmaıdy, túnde aıyrylyp qalasyńdar" dep aıtty. Biraq Arekeń: (Aron Atabek - red) "Meni alyp ket. Men myna jerde qalmaımyn. Mynalar meni óltiredi" dep aýrýhanaǵa jatýdan bas tartty, – dedi belsendi M. Esenǵazy.
Aıta keteıik, 5 qazan kúni belsendiniń jaǵdaıy kúrt nasharlap, aýrýhanaǵa shuǵyl jetkizilgen. Keıin Atabektiń aýrýhanaǵa jatýdan bas tartqany belgili boldy. Qazir ol úıinde jasandy tynys alý apparatymen demalyp jatyr.
Aron Atabek 15 jyldan astam ýaqyt túrmede otyrdy. Ol 2006 jylǵy "Shańyraq" oqıǵasynan keıin 18 jylǵa sottalǵan. Sot Atabekti "Shańyraq" oqıǵasy kezinde qaza tapqan polısıa qyzmetkeriniń ólimine aıypty dep tanyǵan.
Pikir qaldyrý