Almatynyń bas sanıtar dárigeri Jandarbek Bekshın qalada  koronavırýstyń jańa tolqyny bolýy yqtımal ekenin eskertti. Bul týraly ol ortalyq komýnıkasıalar alańynda ótken brıfıńte málimdedi.

– Batys Eýropada, Amerıka kontınenti jáne Azıa kontınentinde jańa mýtasıadan ótken shtammdar anyqtalýda. Soǵan baılanysty jańa tolqyndar bastalýda. Ár elde jańa mýtasıadan ótken shtammdar anyqtalǵan. Onyń ishinde búkil álemdi alańdatyp otyrǵan "Delta" shtammy. Ol bir elderge erte, bir elge kesh keledi, – dedi bas sanıtar dáriger.

Bekshın koronavırýstyń úshinshi tolqyny kóktemde ótkenin atap ótti. Aıtýynsha, qazir biz tórtinshi tolqynnan shyqtyq. 

– Keleshekte mynadaı tolqyn deńgeıinde deıtin aýrýdyń kóbeıýi múmkin emes. Aýa raıynyń salqyndaýyna baılanysty aýrý shamaly kóterilýi múmkin. Sebebi qazir kóp turǵyndar jabyq ǵımarattarǵa kóship jatyr. Onyń ishinde balalar, stýdentter, oqýshylar, qoǵamdyq kollektıvtegiler kirisýde. Sondyqtan biz oqýshylarǵa jáne stýdentterge qatań tekseris júrgizip jatyrmyz. Bul másele bizde qatań baqylaýda tur, – dep aıtty Jandarbek Bekshın.