Dál osyndaı taqyryppen búginde oblystyq ardagerler keńesiniń jer-jerde jergilikti turǵyndarmen keleli kezdesýler ótkizip jatqandyǵy buqaralyq aqparat quraldary arqyly kópshilikke málim. Buǵan deıin Saryaǵash jáne Maqtaral aýdandarynyń jurtshylyǵymen baıypty basqosý ótkizgen oblystyq ardagerler keńesiniń tóraǵasy, Túlkibas jáne Ordabasy aýdandarynyń Qurmetti azamaty Jeńisbek Máýlenqulov bastaǵan top sársenbi, ıaǵnı 16 qyrkúıek kúni Shardara jurtshylyǵymen kezdesý ótkizdi.
Atalmysh is-sharaǵa qala, aýyl ákimderi, bólim, mekeme basshylary, bilim, densaýlyq saqtaý qyzmetkerleri, tyl jáne soǵys ardagerleri men BAQ ókilderi qatysty.
Abaı mádenıet úıinde ótkiziletin is-sharadan aldyn oblys ortalyǵynan arnaıy at terletip kelgen mártebeli meımandar “Tuńǵysh Prezıdent” saıabaǵyndaǵy Keńes Odaǵynyń batyrlary Abylaı Álimbetov, Seıitqasym Áshirov pen Halyq qaharmany Máýlen Qalmyrzaevtyń eskertkishi men Uly Jeńistiń 70 jyldyq merekesine oraı ornatylǵan obeleıskige gúl shoqtaryn qoıyp, sondaǵy Shardara aýdandyq tarıhı ólketaný murajaıyna qoıylǵan qundy jádigerlermen tanysty.
Atalmysh is-sharanyń maqsaty aǵa býyn ókilderiniń ónegeli ómir joldaryn keıingi tolqyn jastar arasynda nasıhattaý, urpaqtar arasyndaǵy sabaqtastyqty damytý baǵytyndaǵy jumystardy jandandyrý. El birligi men yntymaǵynyń arta túsýine yqpal etý.
Mádenıet úıindegi mańyzdy basqosýdy oblystyq ardagerler keńesiniń tóraǵasy Jeńisbek Máýlenqulov ashyp, júrgizip otyrdy.
Alǵashqy bolyp sóz alǵan aýdan ákimi búgingi “Ata-baba dástúri–urpaqqa amanat” baǵdarlamasy aıasynda jurtshylyqpen kezdesý ótkizýge kelgen mártebeli meımandarǵa alǵys aıtyp, bul baǵytta aýdanymyzda atqarylyp jatqan ıgilikti is –sharalarǵa qysqasha toqtalyp ótti.
Munan keıin minbege kóterilgen Jeńisbek Máýlenqulov “Otandy súıý–urpaqqa amanat” jáne “Uly Jeńiske–70 jyl” atty taqyryp aıasynda maǵynasy keń mazmundy habarlama jasady. Ol kisi, ásirese, kórshi aýdandarmen salystyrǵanda Shardara qalasynyń muntazdaı tazalyǵyna tánti bolǵanyn aıryqsha atap ótti. Sondaı-aq, keńes tóraǵasy ótken jyly qazyǵyn ózi qaǵysqan aýdandyq ardagerler úıiniń qysqa merzim ishinde, onda da jeke kásipker Ǵanı Taıjanov inimizdiń qarjysy esebinen turǵyzylǵanyn estip, Ǵanı balasyna degen aǵalyq alǵys sezimin bildirdi.
J.Máýlenqulovtyń maǵynaǵa toly mazmundy áńgimesinen keıin Uly Jeńistiń 70 jyldyǵyna oraı arnaıy túsirilgen beınefılm kórsetildi. Shynyn aıtaıyq fılmdi kórgen jurtshylyqtyń kózderine jas almaǵandary qalǵan joq.
Al “Alash” syılyǵynyń laýreaty, jazýshy, Ońtústik Qazaqstan oblysynyń qurmetti azamaty, oblystyq ardagerler keńesiniń múshesi Marhabat Baıǵut aǵamyz “Imandy ul, ınabatty qyz eldiń kórki” degen taqyrypta habarlama jasady. Qansha degenmen jazý, syzýdyń adamy emes pe, aıtar oıyn ashyq ári naqtyly mysaldar arqyly jınalǵan jurtshylyqtyń júrekterine jetkize bildi.
Marhabat Baıǵut aǵamyzdan keıin sóz kezegi fılosofıa ǵylymdarynyń . kandıdaty, M.Áýezov atyndaǵy OQMÝ-dyń halyqaralyq qatynastar jáne saıasattaný kafedrasynyń meńgerýshisi Sáken Májinbekovke berildi. Ol kisi álemdik ǵylymǵa «Qazaq órkenıeti» degen sóz tirkesi engizilgenin maqtanyshpen aıta kelip, tórtkúl dúnıeniń tórt buryshynda bolyp jatqan dúrbeleń oqıǵalarǵa keńinen toqtalyp ótti. «Qazirgi jaǵdaıymyzǵa shúkirshilik aıtýymyz kerek, - dedi ol jastar otyrǵan artqy jaqqa nazaryn tiktep. – Bizdiń baǵymyz da, sorymyz da búgingi ulan ǵaıyr jerimiz bolýy bek múmkin. Batysymyzda bizdi 70 jyl boıy bodandyqta ustap kelgen aq aıý– Reseı memleketi tursa, shyǵysymyzda jeti basty aıdahar – Qytaı memleketi. Olar bizdiń asty-ústi qazba baılyqqa toly jerimizge kóz tigip otyrǵanyn umytpaýymyz kerek. Ol úshin aınaldyrǵan 17 mıllıon halqy bar Qazaqstan halqyna birlik, yntymaq qajet. Sonan soń jastarymyzdyń bilimdi de, bilikti bolýyn qalaǵan bolar edim».
Kezek oblystyq ardagerler keńesiniń tóraǵasynyń orynbasary, ájeler alqasynyń tóraıymy Úrzada Aıbekovaǵa berilgende jınalǵan jurtshylyq bir sát siltideı tyna qaldy. Ol «Yrysy mol, órisi keń tárbıe otbasynan bastalady» atty taqyrypta habarlama jasady. Habarlama jasady degeni bolmasa, aıtar oıy men berer keńesterin túgeldeı qaǵazǵa qaramastan aýyzsha jetkizdi.
Oblystyq top quramynda kelgen Ordabasy aýdandyq ájeler alqasynyń tóraıymy, ardager ustaz, QR «Bilim berý úzdigi» tós belgisiniń ıegeri, Ordabasy aýdanynyń qurmetti azamaty Aıymgúl Kókishova da urpaq tárbıesi jónindegi ulaǵatty oılaryn kópshilikpen bólisti.
Alqaly jıyndy oblystyq ardagerler keńesiniń tóraǵasy Jeńisbek Máýlenqulov qorytyndylap, aýdan ákimi Qamytbek Aıtóreev, máslıhat hatshysy Toqsanbaı Berdibekov, atalmysh is-sharaǵa demeýshilik jasaǵan Qýanbek Abdýllaev, Dáýrenbek Sandybaev, Ǵanı Taıjanov, Zákirhan Talbıdın jáne Baqytjan Sermańyzovqa oblystyq ardagerler keńesi atynan «Alǵys hattar» tapsyrdy.
«Ata-baba dástúri – urpaqqa amanat» baǵdarlamasy aıasynda ótkizilgen is-shara sońy aýdandyq mádenıet jáne tilderdi damytý bólimi ázirlegen kóńildi konsertke ulasty.
Q.Dáýiruly
«Qamshy» silteıdi
