Álemdegi eń iri elektromobıl óndirýshi Tesla kompanıasy shtab-páterin AQSH Kalıfornıa shtatynan Tehasqa kóshiretinin jarıalady.

Bul qadam týraly kompanıanyń atqarýshy dırektory Ilon Mask Ostındegi jyldyq aksıonerler jınalysynda málimdedi.

Buǵan deıin Mask Kovıdke qarsy áreketine baılanysty Kalıfornıa shtatynyń jergilikti saıasatkerlerimen kelispeýshilikke tap bolǵan. Tesla-nyń negizgi zaýyty ornalasqan Alameda okrýgi pandemıaǵa baılanysty Masktyń kompanıasyna birneshe ret eskertý jasaǵan. 

Ol aksıonerlerge Fremonttaǵy fabrıkada (Kalıfornıa) kóptegen jetispeýshilik pen qolaısyzdyq bolǵanyn aıtty jáne birneshe sebebin keltirdi.

– Sonymen qatar Kalıfornıada Tesla qyzmetkerlerine qoljetimdi baspana tabý qıyn, zaýytty masshtabtaý shekteýli boldy. Al Ostınde bizdiń fabrıka áýejaıdan bes mınýttyq jerde, qala ortalyǵynan 15 mınýttyq jerde, – dedi Mask aksıonerlerge.

Tehnologıalyq kásipker keıde Kalıfornıa bıligimen qaıshylyqty qarym-qatynasta bolǵan.

Mamyr aıynda jergilikti bılik Kalıfornıadaǵy Tesla kompanıasynyń Fermond zaýytyn jabyq ustaýǵa buıryq bergen. Bul jergilikti saıasatkerler men Mask arasynda úlken daý týdyrdy.

Mask Twitter-de "Tesla endi shtab-páterin jáne bolashaq baǵdarlamalaryn birden Tehas/Nevadaǵa kóshiredi" dep jazdy. Alaıda bul qadam ázirge rastalmady.