«Nur Otan» partıasy Tóraǵasynyń Birinshi orynbasary Baýyrjan Baıbek Saıası keńestiń keńeıtilgen otyrysy qarsańynda Elbasy, partıa Lıderi Nursultan Nazarbaevtyń tapsyrmasy boıynsha óńirlerge saparyn jalǵastyrýda. Búgin ol «Nur Otan»-nyń saılaýaldy baǵdarlamalarynyń Shymkent qalasynda oryndalý barysymen tanysty.

Fılıal tóraǵasy, Shymkenttiń ákimi Murat Áıtenovtiń málimdeýinshe, 9 aıda 2025 jylǵa deıin josparlanǵan 475 ındıkatordyń 23%-i oryndalǵan. Qalada 398 myń sharshy metr turǵyn úı, 5 medısınalyq mekeme men 115 sport alańy paıdalanýǵa berilgen. 250 myń adamdy úzdiksiz elektr qýatymen qamtamasyz etý maqsatynda «Bozaryq» elektr qosalqy stansıasy salynǵan. Gaz taratý stansıasynyń qurylysy aıaqtalýda, ol 5 shalǵaı eldi mekendi tabıǵı gazben qamtamasyz etetin bolady. 14 myńnan astam jańa jumys orny ashyldy.

«Memleket basshysy jarıa etken «Ózgerister joly: Ár azamatqa laıyqty ómir!» Saılaýaldy baǵdarlamasy aıasynda bilim berý salasyna erekshe nazar aýdarylady. El kóleminde 800 jańa mektep salý jáne 5 myń qoldanystaǵy mektepti jańǵyrtý josparlanǵan. Tikeleı Shymkentte taıaýdaǵy 5 jylda 66 mektep salý jáne jóndeý josparlanǵan, bul rette 25 oqý orny bıyl salyndy. Sapar barysynda №79 jańa mektepte pedagogter ujymymen kezdestim. Memleket basshysynyń tapsyrmasymen bıyl muǵalimderdiń jalaqysy 25%-ke ósti. Partıanyń saılaýaldy ýádelerin iske asyrý aıasynda pedagogterdiń eńbekaqysy 2024 jylǵa qaraı 2 ese kóbeıip, ortasha alǵanda 330 myń teńgeden asady», – dep jazdy Baýyrjan Baıbek Facebook jelisindegi paraqshasynda.

Onyń aıtýynsha, partıa jastar men áıelder kásipkerligin qoldaýǵa erekshe nazar aýdarady. Sondyqtan ol Shymkentte kásipkerlikti jańadan bastaýshylarǵa, eń aldymen jastar men áıelderge qoldaý kórsetetin onlaın-ortalyq ashqan «Bolashaq» baǵdarlamasynyń túlekterimen kezdesti. Bolashaqtyqtar atap kórsetkendeı, İT jáne agrotehnologıa, arhıtektýra, dızaın jáne basqa da salalar boıynsha tegin keńes beriledi.

Sol kúni partıa Tóraǵasynyń Birinshi orynbasary Shymkent qalasynda, sondaı-aq Túrkistan jáne Qyzylorda oblystarynda saılaýaldy ýádelerdiń iske asyrylý barysyn onlaın-formatta qarastyrdy. Baýyrjan Baıbek fılıaldar basshylyǵy men máslıhattardaǵy fraksıalardyń nazaryn jyl sońyna deıin oryndalmaı qalý qaýpi bar jekelegen tarmaqtarǵa jáne osy baǵyttaǵy jumystardy kúsheıtý qajettigine aýdardy.

«Elbasy 2019 jyly balalardyń ınternattarda ómir súrý jaǵdaılaryn jaqsartý boıynsha sharalar qabyldaýdy tapsyrǵan bolatyn. Memleket basshysy Qasym-Jomart Toqaev bıyl jyl basynda VII shaqyrylymdaǵy Parlamenttiń birinshi sesıasynyń ashylýynda balalardyń quqyǵyn qorǵaý máselesine erekshe nazar aýdarý mindetin qoıdy. Osy tapsyrmalardy oryndaý úshin balalardyń ınternattarda ómir súrý jaǵdaılaryna keshendi taldaý júrgizildi. Balalar quqyǵyn qorǵaý jónindegi keńestiń derekteri boıynsha, barlyq ınternatqa kúrdeli jáne aǵymdaǵy jóndeý júrgizilgen jalǵyz óńir – Pavlodar oblysy. Sondaı-aq, Qostanaı oblysy da aldyńǵylardyń qatarynda. Bul rette Qyzylorda, Mańǵystaý, sondaı-aq Almaty jáne Túrkistan oblystarynda ahýal qanaǵattanarlyqtaı emestigi baıqalady. Árbir balaǵa tolyqqandy jaǵdaıdy qamtamasyz etý – bizdiń saılaýaldy baǵdarlamamyzdyń basymdyqtarynyń biri. Sondyqtan Keńestiń bastamasy boıynsha bul másele kelesi aptada Partıalyq baqylaý komıtetiniń qaraýyna usynylady», – dep eskertti partıa Tóraǵasynyń Birinshi orynbasary.

Baýyrjan Baıbek óńirlik fraksıalar jumysyna jáne bıyl partıanyń Saıası keńesi Búrosynyń sheshimimen engizilgen «Nur Otan»-nan saılanǵan barlyq deńgeıdegi máslıhat depýtattarynyń jarıa reıtıńine jeke toqtaldy.

«Qazirgi kezde bizge jekelegen fılıaldardan partıanyń máslıhattaǵy hatshylary men fraksıa jetekshilerin jarıa reıtıńte qaramaý týraly usynystar kelip túsýde. Reıtıń saılaýaldy mindettemelerdi tıimdi iske asyrýǵa, sondaı-aq olardyń qyzmetiniń ashyqtyǵy men eseptiligin qamtamasyz etý esebinen partıadan saılanǵan depýtattarǵa halyqtyń senim deńgeıin arttyrýǵa baǵyttalǵanyn taǵy da eske salamyn. Bul rette júıeli túrde reıtıńi tómen depýtattardyń tıimdiligi fılıaldardyń Saıası keńesteriniń otyrystarynda qaralyp, ol mandatty keri qaıtaryp alý jáne tıisti depýtattardy rotasıalaý úshin negiz bola alady. Bizdiń partıalyq kadrlyq rezervte 3,4 myńnan astam depýtattyqqa laıyqty úmitkerler bar. Tıisinshe, biz olardy kórsetkishteri tómen depýtattarmen almastyrýdy usynatyn bolamyz», – dep atap ótti ol.