«Nur Otan» tóraǵasynyń birinshi orynbasary Baýyrjan Baıbek Túrkistan oblysyna jumys sapary barysynda óńirde partıanyń saılaýaldy baǵdarlamasynyń oryndalý barysymen tanysyp, birqatar áleýmettik, mádenı nysandarda boldy. Sondaı-aq, Túrkistan mýzykalyq drama teatryna baryp, belgili jazýshy, dramatýrg Dýlat Isabekovtiń pesasyna qoıylǵan «Bórte» spektaklin tamashalady.

«Elbasy Nursultan Nazarbaevtyń birneshe jyl buryn Túrkistandy jańǵyrtý týraly qabyldaǵan tarıhı sheshimi kıeli qalanyń órkendeýine zor serpin bergen erekshe mańyzdy oqıǵa boldy. Túgel túrki táý eter kóne qala jańa mártebege ıe bolǵannan keıin qurylys qarqyndy júrip, qysqa ýaqytta shahar kelbeti qaıta túledi. Záýlim ǵımarattar men zamanaýı áleýmettik-mádenı nysandar boı kóterdi.

Solardyń biri – qasıetti qalada Elbasynyń qoldaýymen salynyp, paıdalanýǵa berilgen Túrkistan mýzykalyq drama teatry. Bul mádenı nysannyń ashylý rásimine Tuńǵysh Prezıdenttiń ózi arnaıy qatysyp, teatr ujymymen kezdesken bolatyn.

Ońtústik óńirge jumys sapary barysynda osynaý óner ordasyna baryp, teatr shymyldyǵyn tuńǵysh ashyp otyrǵan belgili jazýshy, dramatýrg Dýlat Isabekovtiń pesasyna qoıylǵan «Bórte» spektaklin tamashaladym. Kórermender qatarynda respýblıkamyzdyń belgili zıalylary, mádenıet salasynyń ókilderi, sondaı-aq óńirdiń kásipker mesenattary túgeldeı derlik boldy.

Qoıylymǵa arqaý bolyp otyrǵan Bórte – álem tarıhyndaǵy biregeı tulǵa, dúnıeni dúr silkindirgen uly qolbasshy Shyńǵysqannyń jan jary. Qazaq handyǵyn áıgili Altyn Ordanyń izin basqan murageri sanasaq, onyń negizin qalaǵan Joshy hannyń anasy – osy Bórte hanym. Osynaý ǵajaıyp tulǵanyń ómirin ózek etken bul qoıylym tarıhı astary tereń, tárbıelik máni zor týyndy retinde kórermenderdiń kóńilinen shyǵyp, óristi bolatynyna senimdimin.

Kez kelgen qalanyń máni men mazmunyn arttyratyn, ıntellektýaldyq deńgeıin ósiretin sala – mádenıet, bilim oshaqtary men kórnekti oryndar. Osyǵan oraı «Nur Otan» partıasynyń Túrkistan qalasy boıynsha saılaýaldy baǵdarlamasynda týrısik nysandar men kıeli oryndardy damytý, Kúltóbe qalashyǵyn qalpyna keltirý, kórnekti tulǵalary men tarıhı muralaryn tanymal etý sekildi kóptegen jobalardy iske asyrýǵa yqpal etý kózdelgen. Qazirgi tańda Túrkistan mýzykalyq drama teatry, «Uly dala» ortalyǵy, «Farab» kitaphanasy, Etnoaýyl, «Kerýen-saraı» týrısik kesheni jáne t.b. iske qosylǵan.

Qashanda «Nur Otan» ıgi isterdiń basynan tabylyp, elge qajetti bastamalardy tynymsyz atqara bermek», – dep jazdy Baýyrjan Baıbek Instagram-daǵy paraqshasynda.