Ilon Masktyń SpaceX aeroǵaryshtyq kompanıasynyń baǵasy osy aptada ınvestorlardyń aksıalaryn satýdan keıin 100 mıllıard dollardan asty.

SpaceX 755 mıllıon dollar mólsherindegi aksıalardy 560 dollardan satý týraly kelisimge otyrdy. Mámilemen tanys adamdardyń pikirinshe, bul kelisim kompanıanyń baǵasyn 100,3 mıllıard dollarǵa deıin arttyrady. "Kompanıa qazirgi ýaqytta jańa kapıtal tartpady" dep habarlady aqparat kózderi. 

Nátıjesinde, SpaceX qazir álemdegi eń qundy ekinshi jeke kompanıa bolyp sanalady.

Bul aqparat týraly CNBC qarjy basylymyna aty-jónin aıtpaýdy suraǵan adamdar jetkizgen. SpaceX ashyq saýdadaǵy kompanıa emes jáne onyń qarjylandyrýy jeke adamǵa tıesili bolyp esepteledi.

SpaceX kompanıasy bul aqparat týraly ázirge eshteńe jarıalamady.

Kompanıanyń baǵasy sońǵy birneshe jylda kúrt ósken, óıtkeni SpaceX kapıtaldy qajet etetin "Starship" jáne "Starlink" jobalary boıynsha jumysty qarjylandyrý úshin mıllıardtaǵan qarajat jınaǵan.

"Starlink" – Jersharynyń kez kelgen jerindegi tutynýshyǵa joǵary jyldamdyqty ınternetti jetkizýge arnalǵan ǵaryshtyq joba. SpaceX búgingi kúnge deıin "Starlink" jobasy aıasynda 1740 jasandyserik ushyrdy. Kompanıa taratatyn joǵary jyldamdyqtaǵy ınternettiń 14 elde 100 000-nan astam qoldanýshylar bar, olardyń qyzmetteri aıyna 99 dollar turady.

"Starship" jobasy adamdardy aı men Marsqa aparyp, sonda qala salyp, kolonıa qurýdy kózdeıdi. Kompanıa prototıpterdi Tehastyń ońtústigindegi qondyrǵylarda synap jatyr jáne birneshe qysqa synaq reısterin oryndaǵan. Jaqynda juldyzkemeler orbıtada synalmaq. Masktyń aıtýynsha, juldyzkemeler Jerde jolaýshylardy tasýǵa qoldanylady. Juldyzkemeler arqyly Jersharynyń kez kelgen núktesine 50 mınýtta saparlap barýǵa bolady. SpaceX kompanıasy kelesi ushyrylymy úshin normatıvtik kelisimdi kútip otyr.

Qyrkúıek aıynda SpaceX kompanıasy qaıyrymdylyqqa arnalǵan "Inspiration4" dep atalatyn álemdegi birinshi jeke menshik azamattyq orbıtalyq ushýdy júzege asyrdy. "Inspiration4" mısıasy Sent-Djýd balalar zertteý aýrýhanasy úshin qarajat jınaýǵa jáne aqparattandyrýǵa arnalǵan. Tórt adamnan turatyn ekıpaj úsh kún boıy Jerdi aınalyp ushqan.  

NASA 2011 jyldan beri amerıka aýmaǵynan birde-bir ǵaryshkerdi ushyra almaǵan. Masktyń SpaceX kompanıasy AQSH-tyń ǵaryshtyq derjavalar qataryna qaıta qosylýyna kómektesti. Ońtústik Afrıkada týǵan Masktyń aeroǵaryshtyq kompanıasy 2020 jyly Amerıka Qurama Shtattarynyń adamdardy ǵaryshqa ushyrýyn múmkin etti. Sol kezde SpaceX kompanıasy ǵaryshkerlerdiń Qazaqstannan, Kaspıı teńizinen, Baıqońyrdan ótken vıdeosyn jarıalaǵan. Kompanıa qazirge deıin kóptegen ǵaryshkerlerdi ǵarysh stansıasyna jiberdi.