Ilon Mask jeke baılyǵy boıynsha álemdegi eń baı adamdardan qara úzip bara jatyr. "Bloomberg Billionaires Index" málimetteri boıynsha, Masktyń jeke baılyǵy 223 mıllıard dollarǵa jetken. Bul kezinde osy tizimdi jyldar boıy bastap kelgen Bıll Geıts dáýletinen eki esege artyq.

Masktyń SpaceX kompanıasy ınvestorlarmen jasaǵan kelisiminen keıin kompanıa quny 100 mıllıard dollardan asqan bolatyn. SpaceX aeroǵaryshtyq kompanıasy 2002 jyly qurylǵan. Ol Aı men Marsta Jerge táýelsiz qala salý, sonda kolonıa qurýdy maqsat etedi. Sonymen qatar jer ǵalamsharynyń kez kelgen núktesine joǵary jyldamdyqty ınternet taratatyn "Starlink" jobasyn júzege asyrýda.

Kompanıanyń taǵy bir maqsaty – Jerdiń eń alys núktesine 50 mınýt ishinde baratyn, bılet baǵasy qoljetimdi jolaýshylar juldyzkemesin jasaý. Masktyń aıtýynsha, jaqynda Juldyzkeme Jer orbıtasynda alǵash ret synalady.

"Bloomberg" aqparaty boıynsha, "Amazon" kompanıasynyń bas atqarýshy dırektory Djeff Bezos 191,6 mıllıard dollarmen mıllıarderler ıneksindegi jahandyq reıtıńte 2-orynda.

Álem elderiniń ortalyq bankteri ekonomıkaǵa lıkvıdasıa jasaǵandyqtan, mıllıarderlerdiń baılyǵy tez óse bastady. Alaıda mıllıondaǵan adamdar ekonomıkalyq turaqsyzdyq jaǵdaıynda jumyssyz qaldy. "Bloomberg" ındeksi boıynsha, álemdegi 500 eń baı adam osy jyldyń ózinde dáýletterine 742 mıllıard dollar qosqan.

Mıllıarderler ındeksindegi ekinshi orynda turǵan Bezostyń mal-múlikinde 2021 jyly shamaly ǵana ózgeris boldy, óıtkeni "Amazon" aksıalary pandemıa kezinde bir qalypty boldy. Al Bıll Geıts aktıviniń biraz bóligi onyń burynǵy áıeli Melında Frans Geıtske berilgennen keıin mıllıarderdiń baılyǵy azaıdy. Al Mark Sýkerberg dáýletiniń taza quny da tómendedi. Osy aptanyń basynda Facebook kompanıasyna qatysty jalǵan aqparattar týraly daýdan keıin jáne birneshe saǵatqa sozylǵan áleýmettik jeliniń isten shyǵýy Sýkerbergtiń dáýletin 6 mıllıard dollarǵa tómendetti.