Aqtóbede eki jyldan asa ýaqyt túrmede otyryp, aqtalyp shyqqan top-menedjer moraldyq ótemaqy retinde 90 mıllıon teńge talap etti, dep habarlady "Dıapazon" basylymy.

2018 jyly kompanıa bólimshesiniń basshysy 16 mıllıon teńge urlady dep aıyptalyp, sot ony 7 jylǵa bas bostandyǵynan aıyrǵan.

Joǵarǵy sot qylmystyq isti qarastyryp, birinshi satydaǵy sot isti aıyptaý úkimimen júrgizgen, aıyptalýshynyń quqyǵyn buzǵan dep taýyp, isti Aqtóbe oblystyq sotynyń apelásıalyq alqasyna qaıtadan qaraýǵa jibergen. Bul joly kollegıa múldem qarama-qarsy sheshim shyǵaryp, sottalýshyny onyń áreketterinde qylmys quramynyń bolmaýyna baılanysty aqtap shyǵarǵan.

Aqtalyp shyqqan Ardaq esimdi azamat sot arqyly memleketten materıaldyq shyǵyn tóleýdi talap etti.

Ol úsh bala asyrap otyrǵanyn, jasamaǵan qylmys úshin túrmege qamalǵanyn, túrmede otyrǵan kezinde inisiniń janazasyna qatysa almaǵanyn, advokatqa 3 jarym mıllıon teńge jumsaǵanyn aıtyp, moraldyq ótemaqy retinde 90 mıllıon teńge talap etken.

Sot onyń talabyn ishinara qanaǵattandyryp, oǵan moraldyq shyǵyn retinde 20 mıllıon teńge berý týraly sheshim shyǵarǵan. Bul somaǵa moraldyq shyǵyn, zań boıynsha shyǵyndar men eki jyl boıy almaǵan tabysy kiredi dep eseptelingen.