Shymkent qalasyndaǵy «Ońtústik» ındýstrıaldy aımaǵy – respýblıkada alǵashqylardyń biri bolyp ashylǵan ekonomıkalyq áleýetti kóteretin aımaqtardyń birinen sanalady. Munda suranysqa ıe taýarlar óndiretin básekege qabiletti kásiporyndarmen toptasqan. Olardyń arasynda ásirese, qurylys materıaldaryn, óndiristik elektr quraldaryn, motor maıyn jáne ózge de taýarlar óndiretin zamanaýı kásiporyndar bar.

Mysaly, mashına jasaý salasynda transformatorlar óndiretin «Asia Trafo» jaýapkershiligi shekteýli seriktestiginiń jańa zaýyty iske qosylǵanyna úsh jyl endi tolsa da ónimine degen suranys artyp keledi. Zaýyt Shveısarıa men Germanıanyń ozyq eýropalyq zamanaýı tehnologıalyq jabdyqtaryn aldyrǵan. Óndiristi basqarý júıesi tolyǵymen avtomattandyrylǵan. Kompanıanyń ónimderi barlyq eýropalyq standarttarǵa sáıkes keledi. Óndirilgen ónimderdiń 60 paıyzy ishki, al, 40 paıyzy syrtqy naryqqa jol tartýda.

Aıta ketý kerek, ındýstrıaldy aımaqtar – Shymkent ónerkásibiniń tiregi sanalady. Mysaly, 2010 jyly burynǵy fosfor zaýytynyń aýmaǵynanan salynǵan aımaqqa kólik jáne ınjınerlik ınfraqurylym jelilerin júrgizýge búdjetten 6 mıllıard 800 mıllıon teńge qarjy jumsalǵan bolatyn.
– Bul qarjy ózin aqtady. 337 gektar aýmaqta jańa óndiris oryndaryn ashýǵa múmkindik aldyq. Mundaı ındýstrıaldy aımaqtyń artyqshylyǵy kásiporyn ashýdy josparlaǵan ınvestor tek jer telimin ǵana tegin alyp qoımaı, sonymen qatar ol óz kásipornyna elektr qýaty, gaz, sý, jol men temir jol tuıyǵyn jetkizý máselesine de bas qatyrmaıdy. Osyndaı ınfraqurylymynyń barlyǵy ázirlengen jer telimin alyp, sol jerge óz zaýytyn sala berýine múmkindik jasaldy, - deıdi Shymkent qalalyq kásipkerlik jáne ındýstrıaldy-ınnovasıalyq damý basqarmasynyń basshysy Bereke Dúısebekov.