«Nur Otan» partıasynyń Tóraǵasy, Elbasynyń 2019 jyly «Jastar jyly» aıasynda «Jas maman» jobasynyń oryndalýyn baqylaý maqsatynda Bilim jáne ǵylymdy damytý jónindegi respýblıkalyq Qoǵamdyq keńestiń tóraıymy, Májilis depýtaty, «Nur Otan» partıasy fraksıasynyń múshesi Súleımenova Juldyz Dosbergenqyzy Shymkenttegi eki kolejdi aralady.

Aldymen qaladaǵy №5 «Jeńil ónerkásip jáne servıs kolejiniń» ujymymen kezdesip, oqý ornynyń materıaldyq-tehnıkalyq jaǵdaıymen tanysty.

Atalmysh bilim mekemesinde búgingi tańda myńnan asa shákirt tárbıelenýde. Olar tigin óndirisi jáne kıimderdi úlgileý, tiginshi, arnaıy tiginshi, modeler-pishýshi, tehnık-tehnolog, toqyma óndirisi, toqyma mashınasynyń operatory mamandyqtary boıynsha bilim alýda.

Odan soń Májilis depýtaty Shymkenttegi Jol-kólik kolejine bardy. Bul oqý ornynda «Jas maman» jobasy boıynsha garaj kesheninde «Jeńil avtokólikke qyzmet kórsetý jáne jóndeý», «Júk kóligine qyzmet kórsetý», «Shanaq jóndeý» quzyrettilik alańdary, «Qozǵaltqyshtar men transmısıalardy bólshekteý qurastyrý» zerthanalyq kabıneti ashylyp, jańa qural-jabdyqtar ornatylǵan.

«Jas maman» jobasynyń negizgi maqsaty - halyqaralyq standarttar talaptaryna saı joǵary bilikti mamandardy daıyndaý jáne halyqaralyq standarttarǵa sáıkes zamanaýı úlgidegi qural-jabdyqtardy jańartý.

Joba aıasynda kolejderdiń materıaldyq-tehnıkalyq bazasyn halyqaralyq standarttar talaptaryna saı, sońǵy zamanaýı úlgidegi qural-jabdyqtarmen qamtamasyz etý - bilim sapasyn kóterý jolynda oń serpin bereri sózsiz.