«Nur Otan» partıasynyń janyndaǵy bilim jáne ǵylymdy damytý jónindegi respýblıkalyq qoǵamdyq keńestiń tóraǵasy Juldyz Dosbergenqyzynyń is sapary «Nur Otan» partıasynyń «Ózgerister joly: Ár azamatqa laıyqty ómir!» atty 2021-2025 jyldarǵa arnalǵan saılaýaldy baǵdarlamasyn iske asyrý jónindegi Jol kartasy boıynsha bilim salasynda atqarylǵan aýqymdy jobalarymen tanysýǵa jalǵasty.

Shymkent qalasy boıynsha partıanyń saılaýaldy baǵdarlamasyn iske asyrý úshin ázirlengen Jol kartasyndaǵy 149 keshendi is-sharanyń qatarynda úsh aýysymdy mektep máselesin túpkilikti sheshý kózdelgen. Osy maqsatta qalanyń soltústik bóliginde ornalasqan «Turan» shaǵyn aýdanynda bıyl 1200 orynǵa laıyqtalǵan mektep paıdalanýǵa berilgen. Qazirgi tańda atalǵan aýdanda turǵyn úı qurylysy qarqyn alǵan. Iaǵnı, aldaǵy ýaqytta ondaǵy turǵyndar sany arta túsetini belgili. Soǵan sáıkes keler jyly mekteptegi oqýshylar sany 2 myńǵa deıin jetedi degen boljam bar.

Atalǵan bilim uıasyna arnaıy barǵan Májilis depýtaty Juldyz Súleımenova ondaǵy oqý prosesin baqylap, jańa oqý ǵımaratynyń zaman talabyna saı jaraqtandyrylǵanyn atap ótti. Sonymen qatar ol, oqýshylardy jańa oqý jylynyń bastalýymen quttyqtap, olarǵa sáttilik tiledi.

Aıta keteıik, bıyl qalada 5 úsh aýysymdy mekteptiń máselesi oń sheshilip, olardyń sany 14-ten 9-ǵa azaıady.