Tuǵyrly Táýelsizdiktiń eń úlken jetistikteriniń biri – qandastarymyzdyń elge oralýy. Jyldar boıy týǵan jerinen jyraqta júrip, elin ańsap kelgen halyqqa qushaǵyn keń jaıyp, jaǵdaıyn jasaǵan Qazaqstanǵa olardyń aıtar alǵysy sheksiz. 15 jyl buryn sondaı Uly kóshtiń biri Shymqaladaǵy Asar shaǵynaýdanynan qonys tepken bolatyn.

Taǵdyrdyń tálkegimen shet el asyp, ózge memleketti panalaýǵa májbúr bolǵan qandastarymyzdy atajurt – Qazaqstanǵa shaqyrý Táýelsizdik alǵan jyldardaǵy eń aýqymdy bastamalardyń biri boldy. Búginge deıin qazaqtyń mıllıonnan astam balasy elge oralǵan.

Bul baǵytta úshinshi megapolıste de kóptegen sharalar júzege asty. 2006 jyly «Nurly kósh» baǵdarlamasy aıasynda Ózbekstannan oralǵan 2000 qazaq otbasy Shymkentten qonys taýyp, jap-jańa «Asar» atty shaǵynaýdannyń irgesi qalandy. Kindik qany tamǵan jerin ańsap kelgen aǵaıynǵa arnalyp barlyq qoldaý kórsetildi. Baspana, áleýmettik kómek, jumyspen qamtý, balalardy mektep pen balabaqshamen qamtamasyz etý syndy sharalar atqaryldy.

Búginde Asardyń halqy 25 myńǵa jýyqtaıdy. Shaǵynaýdanda 2 bilim ordasy men 3 bóbekjaı jumys isteıdi. Sondaı-aq, birneshe medısınalyq mekeme halyq ıgiligi úshin qyzmet etedi. Bir shańyraq astynda tatý tátti ǵumyr keshken turǵyndar basty baılyq - táýelsizdik, basty uryn - birlik dep biledi. Ásirese, ataqonystyń qadirin jaqsy bilgen qart kisiler eldiń tynyshtyǵyn tileýden jańylmaıdy.

Aıtyp óteıik, táýelsizdik jyldary elge 1 mıllıonǵa jýyq qandasymyz oralǵan. Onyń 60 paıyzǵa jýyǵy Ózbekstannan kelgen otandastarymyz. Qalǵany Qytaı, Mońǵolıa, Reseı jáne Túrkimenstannan oralǵan qazaqtar.