Qazaqstan Respýblıkasynyń «Advokattyq qyzmet jáne zań kómegi týraly» Zańymen jekelegen halyq sanattary zańgerlik kómekti tegin alýǵa quqyly tulǵalar retinde bilgilengen.

Aqysyz quqyqtyq qyzmetter keshendi áleýmettik zań kómegi túrinde nemese memleket kepildik bergen zań kómegi aıasynda kórsetilýi múmkin.

Keshendi áleýmettik zań kómegi erikti túrde óteýsiz zań kómegin kórsetý shartyna sáıkes:
- «Arnaýly áleýmettik qyzmetter týraly» Qazaqstan Respýblıkasynyń Zańyna sáıkes ómirlik qıyn jaǵdaıda júrgen adamdarǵa;
- ataýly áleýmettik kómekke quqyǵy bar adamdarǵa;
- Uly Otan soǵysynyń qatysýshylaryna jáne jeńildikter boıynsha Uly Otan soǵysynyń qatysýshylaryna teńestirilgen adamdarǵa;
- basqa memleketterdiń aýmaǵyndaǵy urys qımyldarynyń ardagerlerine;
- birinshi jáne ekinshi toptardaǵy múgedekterge;
- jasyna baılanysty zeınetkerlerge;
- qarttar men múgedekterge arnalǵan jalpy tıptegi medısınalyq-áleýmettik mekemelerde (uıymdarda) turatyn qarttar men múgedekterge kórsetilýi múmkin.

Keshendi áleýmettik zań kómegi degenimiz – klıentti zań kómegin surap ótinish jasaǵan kezinen bastap Qazaqstan Respýblıkasynyń zańdarynda kózdelgen tártippen is boıynsha qorytyndy quqyqtyq sheshim qabyldanǵanǵa (quqyqtyq jaǵdaı sheshilgenge) deıin quqyqtyq qoldap otyrý.

Keshendi áleýmettik zań kómegin advokattar jáne tıisti palatalardyń múshesi bolyp tabylatyn zań keńesshiler usyna alady.

Al, memleket kepildik bergen zań kómegin ákimshilik jaýaptylyqqa tartylǵan tulǵaǵa, kúdiktige, aıyptalýshyǵa, sottalýshyǵa, sottalǵan adamǵa, aqtalǵan adamǵa, jábirlenýshige quqyqtyq konsýltasıa berý, sondaı-aq sottarda, qylmystyq qýdalaý organdarynda, ózge de memlekettik organdar men memlekettik emes uıymdarda jeke tulǵalardyń múddelerin qorǵaý jáne bildirý túrinde Qazaqstan Respýblıkasynyń zańnamasynda belgilengen tártippen advokattar kórsetedi.

Memleket kepildik bergen zań kómegi alımentter óndirip alý, zeınetaqy men járdemaqylar taǵaıyndaý, aqtaý, bosqyn nemese qandas mártebesin alý máseleleri boıynsha jeke tulǵalarǵa, ata-anasynyń qamqorlyǵynsyz qalǵan kámeletke tolmaǵandarǵa da advokattar tarapynan kórsetilýi múmkin. Advokattar qajet bolǵan jaǵdaılarda quqyqtyq sıpattaǵy jazbasha qujattar jasaıdy.

Bul rette, tulǵalarǵa memleket kepil bergen zań kómegin kórsetken soń, advokattar óz qyzmetine aqyny respýblıkalyq búdjetten alady. Atap aıtqanda, 2020 jyly azamattarǵa atalǵan tártippen quqyqtyq kómekti kórsetken Shymkent qalasynyń advokattaryna 63 mln.teńge tólense, 2021 jylǵa osy maqsattarǵa búdjetten 100 mln.teńge bólindi.

Aıta ketý kerek, kelesi jyldary memleketten osy maqsattarǵa bólineti qarjy kólemi arta túsetin bolady.