Májilistegi «Nur Otan» fraksıasy partıanyń saılaýaldy baǵdarlamasynyń oryndalýyn baqylaýdy jalǵastyrady. Bul týraly búgin májiliste palata spıkeri, «Nur Otan» partıasy parlamenttik fraksıasynyń jetekshisi Nurlan Nyǵmatýlın málimdedi.

Partıanyń saılaýaldy baǵdarlamasynyń «Jol kartasyn» oryndaýdyń aralyq qorytyndylary májiliste fraksıanyń keńeıtilgen otyrysynda qaraldy.

Onda Úkimettiń jáne fraksıanyń «Nur Otan» partıasynyń 2025 jylǵa deıingi «Ózgerister joly: ár azamatqa laıyqty ómir!» saılaý baǵdarlamasyn oryndaýdyń jol kartasyn iske asyrýdyń aralyq qorytyndy jumysy týraly aıtyldy.

Májilis tóraǵasy Nurlan Nyǵmatýlın partıanyń saılaýaldy baǵdarlamasyn  oryndaý boıynsha Elbasy, «Nur Otan» partıasynyń tóraǵasy Nursultan Nazarbaevtyń mańyzdy tapsyrmalaryn júzege asyrý maqsatynda jol kartasy ázirlenip, partıanyń saıası keńesi búrosynyń qaýlysymen bekitilgenin atap ótti.

– Jol kartasyn iske asyrýǵa monıtorıń jáne baqylaý jasaý boıynsha Fraksıa men Úkimettiń ózara is-qımyl tártibi qabyldandy. Osyǵan sáıkes, nátıjege qol jetkizý úshin jol kartasynyń árbir tarmaǵy boıynsha jeke vıse-mınıstr bekitilip, onyń oryndalýyn baqylaý naqty depýtattarǵa – fraksıa múshelerine júktelgen, – dedi N.Nyǵmatýlın.

Májilis tóraǵasy «Jol kartasynyń» barlyq tarmaqtary jalpy aıtqanda ýaqytyly jáne sapaly oryndalyp kele jatqanyn alǵa tarta kelip, birqatar ózekti máselelerdi atap ótti. Olar: qarjylandyrý, jol kartasyn iske asyrý prosesinde ortalyq jáne jergilikti atqarýshy ózara is-qımylyna jáne  uıymdastyrýshylyq baǵyttaryna qatysty.

Otyrys barysynda Nurlan Nyǵmatýlın 2021 jylǵy máselelerdi barynsha tıimdi sheshýge jáne jol kartasyn iske asyrýdyń ekinshi jylyn senimdi túrde pysyqtaýǵa jumyldyrý qajettigin aıtty.

– Bul aldaǵy bes jyldyń ishinde elimizdi jańa damý baǵytyna bastaıtyn, sonymen birge, halqymyzdyń áleýmettik jaǵdaıyn odan ári arttyrýdyń jol kartasy. Osy jolda Elbasymyz, partıamyzdyń tóraǵasy Nursultan Ábishuly aldymyzǵa naqty tapsyrmalar qoıyp otyr. Ózderińiz de kórip otyrsyzdar, ol tapsyrmalardy júzege asyrý úshin  jaýapty adamdar bekitildi, baqylaý tolyqtaı qamtamasyz etildi. Endi óte joǵary jaýapkershilikpen qaraý kerek. Ol árbir depýtattyń da, árbir Úkimet múshesiniń de negizgi mindeti, – dedi májilis tóraǵasy.

Sonymen birge, jıynǵa depýtattarmen qatar premer-mınıstrdiń birinshi orynbasary Álıhan Smaıylov, úkimet músheleri jáne «Nur Otan» partıasynyń hatshysy Marat Sembekov qatysty.

Májilistiń baspasóz qyzmeti