"Astronomdar bizdiń galaktıkanyń ıaǵnı Qus joly galaktıkasynyń ortalyǵynan kelgen jumbaq radıo tolqyndardy anyqtady. Ǵalymdar ázirge bul erekshe sıgnalǵa túsindirme bere almaı otyr" dep habarlady "The Astrophysical Journal" basylymy seısenbide jarıalanǵan jańa zertteýde.  

Avstralıa, Germanıa, AQSH, Kanada, Ońtústik Afrıka, Ispanıa jáne Fransıadan kelgen halyqaralyq zertteýshiler toby baıqaǵan radıo tolqyndar ár túrli sebepterge baılanysty ózgesheligimen erekshelengen. Radıoteleskop pen ǵarysh koordınattarynyń atymen "ASKAP J173608.2-321635" dep atalǵan nysan buryn-sońdy bolmaǵan ǵarysh nysandaryn tabý jobasy aıasynda ashylǵan.

"The Astrophysical Journal" jýrnalynda jarıalanǵan zertteýlerdiń jetekshi avtory, Sıdneı ýnıversıteti fızıka mektebiniń doktoranty Sıteng Vang nysan jaryǵy kúrt ózgeretinin, kezdeısoq janatynyn jáne óshetinin jetkizdi.

"Bul jańa sıgnaldyń eń tańqalarlyq qasıeti – onyń polárızasıasy óte joǵary. Onyń jaryǵy tek bir baǵytta, biraq bul baǵyt ýaqyt óte aınalyp turady" degen Vang sıgnal buryn zerttelgen kez kelgen qubylysqa uqsamaıtynyn aıtady.

Mamyr aıynda da NASA Jerge sıgnal jiberetin jumbaq radıostansıalardy anyqtaǵan.