Almaty metrosynyń eki jańa beketi iske qosylǵanda jolaýshylar aǵyny kúnine 86 myń adamǵa deıin ósetin bolady Bul týraly Almaty ákimi Baqytjan Saǵyntaev metropolıtenniń ekinshi iske qosý kesheni nysandarynyń qurylys barysymen tanysý barysynda málim etti.
Qala ákimi baspasóz qyzmetiniń málimetinshe, ekinshi iske qosý kesheni aralyq tonnelderden jáne qazirgi kezde árleý jumystary júrip jatqan "Saryarqa" jáne "B. Momyshuly" eki beketinen turady. Keshen ýchaskesiniń trassasy Abaı dańǵylynyń astynda, Altynsarın dańǵylynan Iassaýı kóshesine deıin batys baǵytta ornalasqan. Qurylys uzyndyǵy eki joldy baǵytta 3,08 km quraıdy.
"Ekinshi iske qosý kesheniniń jalpy daıyndyǵy 91%. Búginde temir-beton konstrýksıalarynyń qurylysy, aralyq tonnelderdi qazý aıaqtaldy, sáýlet-árleý jumystary, joldyń joǵarǵy qurylysy aıaqtalyp qaldy. Qalǵan jumystarǵa ınjenerlik jelilerdi tóseý jáne jabdyqty iske qosý kiredi.
Búginde ortasha táýliktik jolaýshylar aǵyny 30 myń adamdy quraıdy. Mamandardyń esepteýi kórsetkendeı, ekinshi iske qosý kesheni paıdalanýǵa berilgen soń ortasha táýliktik jolaýshylar aǵyny shamamen 86 myń adamǵa jetetin bolady. Bul – Abaı dańǵylyndaǵy kólik qozǵalysyn edáýir jeńildetýge jáne myńdaǵan qala turǵyndary men qonaqtarynyń mobıldiligin arttyrýǵa múmkindik beredi" delingen aqparattyq habarlamada.
Qos beketti jyl sońyna deıin paıdalanýǵa berý josparlanǵan. Qala ákimi B. Saǵyntaev jyl sońyna deıin stansıalardyń tehnıkalyq iske qosylýyn qamtamasyz etý úshin qurylys-árleý jumystaryn joǵary qarqynmen júrgizýdi tapsyrǵan.
Al "Qalqaman" beketi trassasy qurylysy júrip jatqan Abaı dańǵylynyń astynda, Iassaýı shesinen Áshimov kóshesine deıin batys baǵytta ornalasqan. Jol uzyndyǵy 2,5 shaqyrym. Qurylysty kelesi jyldyń sońyna deıin aıaqtaý josparlanýda. Eseptik jolaýshylar aǵyny kúnine shamamen 93 myń adamdy quraıtyn bolady.
Pikir qaldyrý