Búgin D.Qonaev dańǵyly kólik qozǵalysyna ashyldy. Qala tynysy úshin mańyzdy bolyp tabylatyn nysannyń qurylysy merziminen 1 jylǵa qysqaryp, paıdalanýǵa berilip otyr.

Aptanyń ár senbisin qurylys nysandaryn qadaǵalaýǵa arnaǵan Murat Áıtenov, Rysqulov-Qonaev jolaıryq qurylysynyń bitken jumystaryn taǵy bir pysyqtap ótti.

Kólik keptelisi – qala tirshiliginiń yrǵaǵy men ekonomıkasyna tikeleı áserin atap ótken qala basshysy D.Qonaev dańǵyly qurylys merzimin barynsha qysqartýdyń mańyzdylyǵyna da toqtaldy.

«İri jolaıryq salý – úlken qalalarǵa tán qubylys. Bul nysan qurylysy barysynda kóptegen qıyndyqtar boldy. Injenerlik júıeleri, ıaǵnı, sý, gaz, elektr jaryǵy, baılanys jelileri aýystyryldy. Qurylys mańyndaǵy kóshelerde kólik ótkizgishtigi shekten asyp, keptelister oryn alyp jatty. Bul árıne turǵyndarǵa qolaısyzdyq týǵyzdy. Merziminen erte aıaqtaý sebebimiz de osy. Jalpy qaladaǵy kólik keptelisin azaıtý maqsatynda kezeń-kezeńimen osy syndy 5 jolaıryq salynatyn bolady»,-dedi M. Áıtenov.

Búgingi ashylǵan D.Qonaev dańǵylynyń ashyq tonnel arqyly jer asty ótý bóliginde aldaǵy ýaqytta jaıaý júrginshiler joly salynatynyn bolady. Qala basshysy jaıaý júrginshiler joly jobada qarastyrylmaǵanmen ony salý qajet ekenin atap ótti.

Sonymen birge ákim qazan aıynyń 25-ne deıin T. Rysqulov kóshesiniń bir tarapy, ekinshi bóligi qarasha aıynyń sońynda paıdalanýǵa beriletinin jetkizdi.

Nysan qurylysyna jaýapty merdiger - «Bazis Construction» JSHS-gi. Jolaıryqtyń jalpy uzyndyǵy D.Qonaev dańǵyly boıynsha - 1 030 m, al T.Rysqulov kóshesi boıynsha - 684,7 m. Joldyń eni - 45 metr.

Jalpy jol aıryqtyń kólik ótkizgishtigi táýligine 141 720 quraıtyn bolady. Osylaısha qaladaǵy kólikter tyǵyny edáýir azaıatyn bolady.