COVID-19 ınfeksıasyna shaldyǵyp, ókpesiniń 62 paıyzy zaqymdalyp aýrýhanaǵa túsken 72 jastaǵy ájeı qaýipti ınfeksıany jeńip shyqty. Naýqasqa dárigerler bir aıǵa jýyq hattama boıynsha em kórsetti.

1949 jylǵy qala turǵyny Myrzalıeva Sharapat óte aýyr hálde 14-shi qyrkúıek kúni qalalyq juqpaly aýrýlar ortalyǵyna kelip túsken. Kelgen kezdegi jaǵdaıy boıynsha qandaǵy ottegi mólsheri, ıaǵnı satýrasıasy 50-den tómen bolǵan. Dárigerler naýqasty jasandy tynys alý apparatyna qosyp, shuǵyl emdik sharalaryn júrgizgen.

Qart kisiniń arterıalyq qan qysymy jáne asqazan men baýyrda qosalqy aýrýlary bar. Kompúterlik tomografıa tekserý nátıjesinde naýqastyń ókpesi 62 paıyz zaqymdalǵany anyqtalǵan.

«Túsken kezde jaǵdaıy óte aýyr boldy. Satýrasıasy ne bári 50-di qurady. Odan bólek qosymsha aýrýlary bar edi. Naýqasqa hattama boıynsha tolyq em kórsetildi. Qazirgi jaǵdaıy jaqsy. Ózdiginen dem alýda. Qandaǵy ottegi mólsheri ornyna keldi. Apa tolyq emdelip úıine oraldy»,-deıdi Beken Syrbekuly.

Komanda bolyp birlesip jumys atqarǵan medısına mamandarynyń eminiń nátıjesinde ájeı qaýipti ınfeksıadan tolyǵymen saýyǵyp shyqty. Jaǵdaıy jaqsarǵan naýqasty dárigerler aýrýhanadan úıine shyǵardy.