Shymkentte bıyl Elimizdiń 30 jyldyq Táýelsizdigi qarsańynda Saıram kómekshi mektep-ınternaty «Saıram kómekshi mektep-ınternat-koleji arnaıy kesheni» mártebesine ıe boldy.

Mektep-ınternaty ǵımaratynyń negizi 1916 jyly qalanǵan. 1935 jyly balalar úıi, 1975 jyly«Saıram kómekshi mektep-ınternaty» bolyp ózgerdi.

Mekeme arnaıy oqytýdy qajet etetin balalardyń psıhofızıkalyq kemshiligin túzetý,  fýnksıonaldyq saýattylyǵynyn arttyryp, eńbekke baýlý jáne qoǵamdyq ómirge beıimdep kelýde.

Búginde burynǵy mektep-ınternattyń ornyna jańa úlgidegi ǵımarat salynyp, 267 bala tárbıe men bilim alýda. Bilim berý kesheni jataqhana, oqýǵımaraty, akt pen sport zaldary, medısınalyq beket jáne asqanamen qamtylǵan.

Keshenniń 36 synyptyq bólmeleri  zamanaýı oqý qurylǵylarymen jabdyqtalǵan. Zamanaýı úlgide boı kótergen ǵımaratta  tiginshilik, aǵash óńdeý, aspazdyq kásipti úıretýge arnalǵan sheberhana bólmeleri, arnaıy kútimdi qajet etetin balalarǵa arnalǵan korreksıalyq oqý, sensorlyq bilim alý, psıholog, logoped mamandardyń synyp bólmeleri arnaıy jabdyqtalyp, jazǵy sport alańy salynǵan.

Mekemede oqý sabaqtary memlekettik tilde  júrgiziledi. Olarǵa kásiptik mamandyqtar boıynsha dıplom beriledi. Qosymsha bilim berý úshin qolóner jáne dene shynyqtyrý  úıirmeleri de jumys júrgizedi.

Shymkent qalasy ákimdiginiń baspasóz qyzmeti