Ǵalym, fılologıa ǵylymynyń doktory, profesor, akademık Serik Qırabaev ómirden ótti. Qaraly habardy aqyn Serikzat Dúısenǵazy jetkizdi.

"Kórnekti ádebıettanýshy ǵalym, synshy, akademık Serik Qırabaev aǵaıymyz dúnıeden ozdy. Alla aldynan jarylqasyn!" delingen aqynnyń áleýmettik jelidegi jazbasynda.

Serik Smaıyluly Qırabaev 1927 jyly 23 naýryzda Qaraǵandy oblysy, Jańarqa aýdany, Atasý aýylynda týǵan.

1952–1955 jyldary "Pıoner" jýrnalynda redaktor, 1955–1958 jyldary "Sosıalısik Qazaqstan" gazetinde meńgerýshi, redaksıalyq alqa múshesi boldy. 1958 jyldan Abaı atyndaǵy Qazaq pedagogıkalyq ınstıtýtynda 30 jyl boıy dosent, profesor, fılologıa fakúltetiniń dekany, qazaq ádebıeti kafedrasynyń meńgerýshisi, ınstıtýt rektorynyń oqý isin basqaratyn orynbasary qyzmetterin atqardy.

Qazaq KSR Ǵylym akademıasynyń Áýezov atyndaǵy Ádebıet jáne óner ınstıtýtynyń dırektory, keıinnen bólim meńgerýshisi bolyp istedi. Fılologıa ǵylymynyń doktory, profesor, KSRO Pedagogıka ǵylymdary akademıasynyń korespondent-múshesi, QR UǴA-nyń akademıgi, Qazaqstan jáne Qyrǵyzstan respýblıkalary ǵylymynyń eńbek sińirgen qaıratkeri, Qazaqstan Respýblıkasy Memlekettik syılyǵynyń ıegeri.

Eńbek Qyzyl Tý, Halyqtar Dostyǵy ordenderimen, kóptegen medaldarmen, Qazaq KSR Joǵarǵy Keńesiniń Qurmet Gramotasymen marapattalǵan. "Qazaqstannyń eńbek sińirgen qaıratkeri", "Otan" ordeniniń ıegeri.

1951 jyly Abaı atyndaǵy Qazaq pedagogıkalyq ınstıtýtyn bitirgennen keıin aspırantýrada oqı júrip, Qazaqtyń memlekettik kórkem ádebıet baspasynyń aǵa redaktory, "Ádebıet jáne ıskýsstvo" jýrnalynyń bólim meńgerýshisi bolyp istegen.