Bilim jáne ǵylym mınıstri Asqat Aımaǵambetov apparat jınalysynda mektep kitaphanalarynda ǵylymı fantasıka janryna kóbirek kóńil bólýdy tapsyrdy.

Mınıstr mektepterdegi kórkem ádebıet qoryn ári qaraı ulǵaıta túsýdi jáne ony satyp alý boıynsha artta qalyp kele jatqan óńirlerde jumysty jandandyrýdy tapsyrdy.

– Tek bir jyl ishinde 2,5 mıllıonnan astam jańa kórkem ádebıet satyp alynyp, tıisti mektepterge jetkizildi. Bul óte mańyzdy jumys. Sondyqtan bul jumysty biz mindetti túrde jalǵastyrýymyz kerek. Kórkem ádebıet qory ári qaraı da ulǵaıtylady. Buǵan deıin mektep kitaphanalarynda qazaq tilindegi kórkem ádebıettiń óte az ekenin aıtyp keldik. Ózderińiz kórip otyrǵandaı, endi kólemi ulǵaıdy. Biraq "memlekettik tilde" degenimiz olardyń barlyǵy qazaq avtorlaryna tıesili degen sóz emes. Negizinen dúnıe júzi ádebıetiniń týyndylary qazaq tiline aýdarylǵan. Budan ózge Túrkistan, Qyzylorda jáne Almaty qalalarynda osy baǵyt boıynsha jumystardy jandandyra túsý qajet, – dedi ol. 

Aımaǵambetov sondaı-aq mektepterde kún saıyn kitap oqýǵa jıyrma mınýt jumsaýdy tapsyrdy. 

– Men ártúrli kitaphanany aralap, qarap júrmin. Árıne, biraz serpilis bar. Osy jumysty ári qaraı da jalǵastyryp, kelesi jylǵy búdjette eskerý kerek. Ǵylymı fantasıka janry, ásirese, balalardyń qıalyn damytý jáne kreatıvti oılaýyn damytýǵa kóńil bólgenimiz jón. Klasıkalyq ádebıetter de bolýy kerek. Qazirgi ýaqytta oqýshylardyń ózi súıip oqıtyn kitaptardy tizimge engizip, oqýlyq ortalyǵy tıisti jumystardy jalǵastyrýy tıis, – dedi Asqat Aımaǵambetov.