28 qazan – halyqaralyq anımasıa kúni. Bul salada Japonıa óziniń anıme dep atalatyn tól týyndylarymen mıllıondaǵan kórermenin taba bilgen. Anımeniń Qazaqstanda da jankúıerleri kóp. Alaıda osy ýaqytqa deıin kórermen anımasıalyq fılmderdi tek orys tilinde kórip keldi. Osy olqylyqtyń ornyn toltyrý maqsatynda Almatyda birneshe erikti jastan turatyn "Dopamine voice" dep atalatyn komanda eshkimniń qoldaýynsyz, qarapaıym múmkindiktermen tanymal japon anımelerin qazaqshaǵa dybystaýmen aınalysyp júr. Top múshesi Bekarys Ismagýlov jobany pikirles adamdardyń qyzyǵýshylyǵynan týǵanyn aıtady.

Top sáýir aıynda qurylǵan. Búginde shyǵarmashyl ujymda 2 dızaıner, 1 montajdaýshy jáne 11 dybystaýshy bar. Bekarys Ismagýlov bastapqyda anımelerdi qazaqsha dybystap, úzindilerin óziniń tık-tok jelisine salyp otyrǵan. Keıin ony montajdaýshy baıqap, birge jumys isteýdi usynǵan.

– Kishkentaıymyzdan anımeni orys tilinde kórip óstik. Sol kezde "osylardy nege qazaq tiline aýdarmaıdy?" dep oılaıtynbyz. Sosyn jaqynnan beri bul isti ózimiz jasap kórýge bel býdyq. Anımelerdi tikeleı japon tilinen aýdaramyz. Aramyzda aýdarmashy bar. Japon tili qazaq tiline óte uqsas. Kóptegen áripter qazaq tiliniń yrǵaǵyna keledi. Sol sebepti anımelerdi orysshadan emes, túpnusqadan aýdaramyz, – deıdi ol.

Dybystaý prosesi óte qarapaıym. Aýdarmashy keıipker sózderin qazaqshaǵa tárjimalap, top múshelerine jiberedi. Eriktiler daýysty árqaısysy óz úıinde, bólmesinde daýys jańǵyrmas úshin kórpe jamylyp, smartfonnyń dıktafonyna jazady. 

Top músheleri Qazaqstannyń túkpir-túkpirinde turady. Olardyń biri 14 jastaǵy oqýshy bolsa, biri stýdent, al endi biri qyzmet isteıdi. Árkim óziniń partıasyn dybystap bolǵan soń astanadaǵy montajdaýshyǵa joldaıdy.

– Jastardyń basyn qosyp otyrǵan eń aldymen ortaq qyzyǵýshylyq bolsa, ekinshiden ana tilin popýlızasıalaý – deıdi Bekarys.

Dybystalǵan anıme Telegram, Tiktok, Youtube jelilerinde jarıalanady. Az ýaqyttyń ishinde olar óz kórermenin taba bilgen. Joba ásirese Tık-tok jelisinde tanymal. Ol jaqta anımelerdiń keı úzindileri 100 myńnan astam qaralym jınaǵan. Tipti qazaq kontentin qoldaıtyn kórermender donat jınaýǵa da daıyn.

– Bul jobanyń bolashaǵy zor. Qazaq tildi kórermen endi-endi bizdi tanyp keledi. Tipti, ár bólim shyqqan saıyn qoldaý retinde donat jiberip otyrady. Máselen, "Tıtandar shabýyly” anımesin bastamaı turyp bir kórermen qoldaý retinde 40 myń teńge jiberdi, – deıdi ol.

Bekarys kórermen qoldaýymen stýdıa ashyp jatqandaryn, taıaýda kórermendi sapaly dúnıemen qýantatynyn jetkizdi.

– Ázirge bizge demeýshiler tarapynan eshqandaı da usynys túspedi. Tek kórermenniń az da bolsa qoldaýynyń arqasynda jaqynda stýdıa ashyp jatyrmyz, keleshekte kásibı túrde ózimizdi damytamyz, – deıdi ol.

Suhbattasqan

Dıana Turlybek