Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady. Bul týraly «Qamshy» portaly «QazAqparatqa» silteme jasaı otyryp habarlaıdy. Eske sala keteıik, keshe Almatyda «Jebeý» qoǵamdyq birlestiginiń osy Kóshi –qon týraly zańǵa baılanysty Baspasóz maslıhaty ótken bolatyn. Onda osy zańnyń bir kemshiligi retinde - azamattyq alǵysy keletin qandastarymyzdan «Sottalmaǵandyǵy týraly» anyqtama talap etiletin tarmaqtyń bar ekendigi talqylandy.
Atalǵan zań jobasy eldiń ishki damýynyń jańa kezeńine jáne áleýmettik-eńbek qatynastaryn jańǵyrtýdy kózdeıdi. «Etnıkalyq qazaqtardy tarıhı otanyna oralýyn yntalandyrý maqsatynda zań jobasymen olardyń qonystaný óńirine qaramastan oralman mártebesin alý, sheteldik azamattarǵa qaraǵanda tólem qabiletin rastaýsyz ýaqytsha turý yqtıarhatyn alý múmkindigi beriledi. Úkimet tarapynan belgilegen óńirlerge qonystanǵan jaǵdaıda oralmandarǵa jaǵdaılar jasalady. Máselen, jumyspen qamtý boıynsha sharalar sheńberindegi etnıkalyq qazaqtar úshin kólik shyǵyndaryn óteıtin, qyzmettik baspana nemese jataqhanadan bólme berýdi quraıtyn áleýmettik paketter qarastyrylady», - dedi Densaýlyq saqtaý jáne áleýmettik damý mınıstri Tamara Dúısenova.
Onyń aıtýynsha, elimizdiń bir óńirinen Úkimet aıqyndaǵan ekinshi óńirine qonystanǵan oralmandar úshin de dál joǵaryda aıtylǵanyndaı áleýmettik toptamalar berilmek. Al alǵashqy qonystanǵan, ıaǵnı Úkimet aıqyndaǵan óńirinen bes jyl merziminen buryn óz betinshe kóship-qonyp, qonys aýdaryp ketkender, Qazaqstan Respýblıkasynyń azamattyǵyn alýdan bas tartqandar ózderi alǵan memlekettik qoldaýlardy qaıtaratyn bolady.
«Oralmandarǵa Qazaqstan Respýblıkasynyń azamattyǵyn berý merzimin turaqty turý yqtıarhatyn alǵannan keıin bir jyl ishinde sheshý kózdeledi», - dedi mınıstr.
Abaı Áljan
