Shymkent qalasynda Memleket basshysy Q.Toqaevtyń «Halyq únine qulaq asatyn memleket» tujyrymdasy aıasynda «Halyq qatysatyn búdjet» jobasy júzege asyrylýda.

Eńbekshi aýdanynda osy joba sheńberinde 56 kópqabatty úıdiń aýlasyn jańartýǵa búdjetten qarjy bólinip, qazir 24 kópqabatty úıdiń aýlasy abattandy. Qalǵan 32 úıdiń aýlasynda búginde abattandyrý jumysy júrgizilýde.

El Táýelsizdiginiń 30 jyldyǵy qarsańynda aýdandaǵy Sh.Ýalıhanov kóshesindegi №225, 225a, 227, 227a kópqabatty úılerdiń aýlasyndaǵy balalar oıyn alańshasy men trenajer, strıt-vorkaýt alańshalary paıdalanýǵa berildi. Alańshalardyń ashylýyna qala ákiminiń orynbasary Maqsut Isahov qatysyp, turǵyndardyń qýanyshyna serik boldy.

Aýdan turǵyndaryna jaıly orta qalyptastyrý úshin «Build stroy» merdiger mekemesiniń demeýshiligimen «Ǵajaıyp baq» demalys orny men baqsha quryldy. Onda balalarǵa gúl, aǵash, basqada kóshetter otyrǵyzyp, tálim-tárbıelik baǵytta eńbekke baýlý kózdelgen.

Aýdan ákimdiginiń málimetinshe, 2022 jyl abattandyrý jumysy «Halyq qatysatyn búdjet» jobasy sheńberinde júzege asyrylady.