Memleket basshysy Qasym-Jomart Toqaev elimizde otbasy tabysynyń túrli deńgeılerine sáıkes keletin biryńǵaı turǵyn úı saıasatyn ázirleýdi tapsyrdy. Iaǵnı, Prezıdent kezekte turǵan az qamtylǵan kóp balaly otbasylarǵa baspana berý máselesin sheshýdi, al baspana satyp alýǵa jaǵdaıy joq azamattarǵa áleýmettik jalǵa alý tártibimen qonystaný úshin múmkindik berý kerektigin aıtqan bolatyn.

Bul baǵytta Shymkent qalasynda júıeli jumystar atqarylyp, jyl basynan beri túrli memlekettik turǵyn úı baǵdarlamalary aıasynda 3 myńǵa jýyq otbasy baspanamen qamtylǵan. Bul jóninde 9 aıdyń qorytyndysy boıynsha qala ákimimne esep bergen qalalyq turǵyn úı basqarmasynyń basshysy A.Rysjanov málimdedi.

Onyń aıtýynsha, jyl saıyn kezekte turǵan azamattarǵa páterler belgilengen tártippen úlestirilip keledi. Osy jyldyń basynan turǵyn úı kezeginde turǵan 682 otbasy arendalyq pátermen qamtylǵan bolsa, jyl sońyna deıin osy baǵytta 294 otbasyǵa baspana beriledi.

Sonymen qatar, jyl basynan «Otbasy bank» arqyly «5-20-25»baǵyty boıynsha kredıttik turǵyn úımen 730 azamat qamtylǵan. Onyń ishinde 261 azamat turǵyn úı kezeginde tirkelgender.

Al, «7-20-25» baǵdarlamasy boıynsha Shymkent qalasyndaǵy ekinshi deńgeıli bankter arqyly jyl basynan beri 1362 azamat alǵashqy turǵyn úıdi naryqtan nesıe rásimdep satyp alǵan. Jyl sońyna deıin kredıttik turǵyn úımen 4 413 otbasyny qamtý josparlanýda.

Budan bólek, «2-10-20 Baqytty otbasy» baǵdarlamasy boıynsha 158 otbasy nesıe negizinde turǵyn jaımen qamtylyp, onyń ishinde 73 otbasyǵa alǵashqy jarnasynyń bir bóligin jabýǵa turǵyn úı sertıfıkaty berildi. Bul jumystar jalǵasyn tabýda.

Kredıttik turǵyn úılerdiń qoljetimdiligin arttyrý jáne tabysy jetpeıtin azamattardy yntalandyrý maqsatynda jergilikti búdjet esebinen aǵymdaǵy jylǵa 500 mln. teńgege turǵyn úı sertıfıkattaryn áleýmettik kómek retinde qaıtarymsyz negizde berý qarastyrylǵan. Bul qyzmet boıynsha 902 ótinim qabyldansa, onyń ishinde 311 ótinim – 274 mln.teńgege maquldanǵan.