Qalanyń aýylsharýashylyǵy salasynda jalpy ónimniń naqty kólem ındeksi bıylǵy jyldyń toǵyz aıynda 101,6%-ǵa oryndalyp, 34,1 mlrd. teńgege jetken. Ónim eksportynyń kólemi 103,2%-ǵa, eńbek ónimdiligi – 107,5%-ǵa artyp, negizgi kapıtalǵa baǵyttalǵan ınvestısıa 4,2 mlrd. teńgege jetken. Bul týraly qala ákimi Murat Áıtenovke bergen esebinde qalalyq aýyl sharýashylyǵy basqarmasynyń basshysy A.Qanybekov baıandady.

Egistik alqaby 29 myń gektardan asyp, jylyjaı kólemi 204 gektarǵa jetken. Bıylǵy jyly 2,6 mlrd teńgege 2 jylyjaı keshenderi iske qosyldy.

Aýyl sharýashylyǵy salasynda 7,6 mlrd. teńge bolatyn 17 ınvestısıalyq joba iske asyrylyp, 248 jumys oryndary ashylǵan. Onyń ishinde 9 jylyjaı keshenderi, 3 taýarly sút fermasy, 7 mal bordaqylaý alańy, 2 balyq shaýashylyǵy, 2 aýyl shaýrýashylyǵy ónimderin óńdeý kásiporny iske qosylǵan, bir qus sharýashylyǵynyń óndiristik qýaty artqan.
Bekitilgen josparǵa sáıkes, jalpy quny 16,3 mlrd. teńgeni quraıtyn 28 ınvestısıalyq jobany iske asyrý kózdelgen. Nátıjesinde qosymsha 1,5 myń adam turaqty jumyspen qamtylatyn bolady.

Azyq-túlik ónimderine baǵa turaqtylyǵyn saqtaý baǵytynda zamanaýı úlgidegi 6 qoımaǵa qosymsha 4 jańa qoıma ashylyp, qala boıynsha barlyǵy 10 qoıma kóterme-taratý ortalyqtary mindetin atqarady. Nátıjesinde óndirilgen ónimder deldaldyq qyzmettiń qatysýynsyz saýda ortalyqtaryna jetkiziledi. Bul baǵytta onlaın saýda jelisin jolǵa qoıý kózdelgen.
Basqarma tarapynan úı irgelik jerlerdi tıimdi ıgerý, kooperasıalardy damytý bastamalary qolǵa alynbaq. Bul jobalar halyqty jumyspen qamtýǵa, turǵyndar tabysyn artyrýǵa serpin beredi.

Aýyl sharýashylyǵy salasyndaǵy jumystyń taǵy bir tyń baǵyty – bul jańa tehnologıalarǵa negizdelgen mal azyǵy óndirisin ashý. Bul baǵytta bir jylda 4 márte ónim alýǵa múmkindik beretin gıdroponıka ádisin keńinen engizý múmkindikteri qarastyrylýda.

Jıyndy qorytyndylaǵan qala basshysy aýyl sharýashylyǵy salasy azyq-túlik qaýipsizdigine jaýap beretin qurylym ekenin aıtty. Aýyl sharýashylyq ónimderin óńdeýdiń mańyzdylyǵyna toqtalyp, azyq-túlik óndirisin damytý boıynsha birqatar tapsyrmalar berdi.